Gula 2
Nakita nila ni Yol ug Nick ang usa ka maanyag nga babaye nga nagsayaw sa stage. Duna ‘say mga babaye nga nakita nila nga nanglingkod lang, pulos g’yud mga guwapa. Nakasabot si Nick nga ang mao nga mga babaye pulos mga entertainers sa bar nga ilang gisudlan.
“Puwede ‘sab mo nga adto sa private room sir, mahimo ra mo nga makakanta didto ug magpik-ap og babaye nga inyong ikauban, pamili ra mo sir,” matud sa floor manager. Miliraw lang ang mga mata nila ni Nick ug Yol nga mitan-aw sa mga maanyag nga babaye.
May usa ka babaye nga nakapadani g’yud sa pagtagad ni Nick. Perfect g’yud ang kaguwapa sa mao nga babaye, puti, igo-igo lang ang gitas-on sa iyang buhok, taliwtiw ang ilong, bawod og pilok ug angayan kaayo sa iyang gisul-ob. “Bay, guwapaha anang babayhana o, pastilan dato man kaayo na og pamorma. Mahal g’yud tingali na og pabayad kun atong i-deyt,” matud ni Nick ngadto sa iyang higala. “Sige na sir, pag-private room na mo,” dason sa floor manager.
“Tana bay, ako’y bahala sa bayranan kay duna ko’y kuwarta,” giingnan ni Nick ang iyang higala. Gihunghongan ni Nick ang floor manager. Nakita ni Yol nga miyango-yango ang floor manager. “Sige ako lang paadtuon sa inyong room,” matud sa floor manager.
Gitug-anan ni Nick ang higala nga si Yol nga iyang itibol ang babaye nga iyang nagustohan. Igo lang mipahiyom si Yol. Pagsulod nila sa private room, nindot g’yud tuod kaayo, ug modern ang TV nga mipilit ra sa bungbong.
Taud-taud, may misulod nga waiter nga mikuha sa ilang order. Wala magdugay, misulod ang floor manager nga kauban na kadto’ng babaye nga nagustohan ni Nick. “Good evening,” matud sa maanyag nga babaye. (Sumpayan)