Gula 5
Mabulokon kaayo ang kalibutan alang ni Albino nga gisugot siya ni Maricel. Tinguha g’yud ni Albino nga pakaslan ang maanyag niya nga girlfriend aron dili na kini mailog pa sa ubang mga kaliwat ni Adan.
Misuroy si Albino sa SM City pagka Biyernes sa hapon, usa ka adlaw sa dili pa ang iyang birthday ug wala tuyoa nga nagkahinagbo sila ug si Maricel nga may kuyog nga laing babaye.
Nakalitan si Maricel nga nagkakita sila. Didto kini namili og iyang mapalit sa men’s section. Dali ra kaayo nga nakasabot si Albino nga si Maricel namili og iyang ikahatag nga gift atol sa iyang birthday.
Giimbitar ni Albino si Maricel ug ang kauban niini nga babaye nga mag-dinner na lang sila sa usa ka fast food restaurant. Gipabut-an ni Albino sila si Maricel ug kauban kun unsay ilang order.
Nagtupad paglingkod sila si Maricel ug Albino, samtang sa atbang ni Albino milingkod ang kaubang babaye ni Maricel. Guwapa ‘sab ang maong babaye kay dili gani kalikayan nga makabig usahay kaniya ang tinan-awan ni Albino.
Mitindog si Maricel ug nananghid nga moadto usa sa CR. Gisundan paglantaw ni Albino ang makabibihag nga bayhon ni Maricel apil ang igwad kaayo niini nga sampot. “Dugay na mo ni Maricel?” matud sa babaye.
“No, last Monday pa g’yud ko niya gisugot pero pinaagi pa lang gani sa text message,” matud ni Albino. Naghimamat sila si Albino ug ang babaye nga nagpaila nga si Riza. “Panggaa baya g’yud ang akong amiga ha? Basin baya og imo lang siya nga pahilakon,” giingnan ni Riza si Albino.
Nalantawan ni Albino nga nagdanga-danga na si Maricel sa ilang nahimutangan gikan sa CR. “Basin inyo ko nga gilibak ha?” ni Maricel pa nga mibaiid kang Albino. (Sumpayan)