Gula 77
Miabot ang among final exam. Mura’g gisayonan ra ko sa among pasulit kay nakapangandam man ko’g maayo. Confident ko nga makapasar gayud sa mga pasulit.
Human sa kataposan kong pasulit, nagdali kong migawas sa eskuwelahan. Paggawas nako sa lobby, nakita nako si Edward nga nagbarog duol sa guwardiya. Miduol dayon siya nako. Nagtingsi ang kanahan.
“Human na ba ang inyong final exam?” Gisugat ko niya’g pangutana.
“Kaluoy sa Diyos,” nako pa, “nahuman na gyud.”
“Maayo hinuon, kay misugot man ko nga hatagan ka’g panahon nga maka-concentrate sa imong pagtuon, gusto kong ako na usab ang hatagan nimo’g panahon karon.”
“Unsay buot mong ipasabot nianang pagkasultiha?” Gisukit ko si Edward kay wala kaayo ko makatugkad sa iyang gipamulong.
“Human na man gyud ang imong final exam,” niya pa, “ako na sab ang gahini sa imong panahon. Gimingaw na ko nimo. Dugay na kong wa makasawsaw sukad sa pagsingabot pa sa inyong final exam hangtod karon.”
“Maldito ka gyud, da. Sawsaw ra gyu’y imong gihunahuna.”
“Sige na gud. Human na bitaw ang inyong final exam. Nag-ingon baya ka nga kutob ra sa adlaw sa inyong pasulit nga dili ta magkita aron dili ka madisturbo sa imong pagtuon.
Unya karon nahuman na man, ako na sab nga turno.” -- Sumpayan pa