Nakabantay si Norman nga adunay babaye nga miabot sa ilang opisina ug nagpakisayod sa bayad kun magpatudlo siya pag-drive og sakyanan. Dugay na nga nagtrabaho si Norman isip driving instructor sa ilang kompaniya ug naanad na ang ilang manager nga kun dunay mga sapian anha ipiyal kaniya ang pagtudlo.
“Man, pasudlon ka ni Mrs. Alicaya,” matud sa secretary sa manager. Pagtangka pa lang ni Norman sa opisina sa manager, gipaila-ila dayon siya ngadto sa babaye. “Mao kini si Norman ma’am ang labing batid nako nga instructor dinhi sa akong driving school. Makasalig ka kaniya kay gawas nga maayo motudlo, buotan.”
Nakasabot si Norman nga diha kaniya gi-assign ang mao nga babaye nga gusto’ng magpatudlo sa pag-drive og sakyanan. Igo lang mitutok kang Norman ang babaye nga nagpahiyom.
“Gusto ni ma’am nga sa first day, ang ato usa nga sakyanan maoy inyong gamiton apan kun makamao na siya og gamay nga mopadagan, kadto nang sakyanan nga bag-o niya’ng napalit maoy inyong gamiton. Ayoha siya pagtudlo kay school mate kini nako kaniadto sa pagtungha sa college,” matud ni Mrs. Alicaya.
Nagsabot sila si Norman ug ang iyang estudyante nga hapiton na lang sa iyang balay inigka-ugma sa buntag. Nagpaila ang babaye nga mao si Marie. Bana-bana ni Norman nga wala pay 40 anyos si Marie ug hitsurahan ‘sab.
Mibayad daan si Marie sa kinatibuk-ang bayranan sa driving school. “Tan-awa Norman kun unsa kabuotan kini si ma’am Marie, gihutdan niya’g bayad bisan wala pa gani makasuway sa atong serbisyo. Ayoha g’yud siya pagtudlo,” matud sa manager.
Tuod, pagkaugma, gihapit ni Norman si Marie sa address nga gibutang sa sketch. Nahingangha siya kay dako man diay kaayo’g balay si Marie. Mipaserbato si Norman tungod sa gate ug taud-taud, adunay mibukas sa gate ug migawas si Marie. (Sumpayan)