Dunay usa ka adlaw’ng Growth Workshop Seminar nga gipahigayon sa usa ka pari ngadto sa tanang mga sakop sa Servant Community nga usa ka karismatik nga relihiyosong kapunongan. Unya, ang tanang nanambong gihatagan sa pari og tagsatagsa ka mga playing clay o dulaang lapok.
“Pinaagi sa maong dulaang lapok, pormaha ninyo ang bisan unsang butang o talan-awon, nga mag-ila ninyo sa inyong kaugalingon kun unsa ug asa namo kutob karon isip renewed person sa pagkasakop ninyo ning relihiyosong kapunongan, diha sa pagtuo ug pag-alagad sa atong Ginoo sa pagkakaron! Unya, isulti usab ninyo ngadto sa tanang nanambong karon, ngano nga ang maong butang o talan-awon maoy napilian ninyong purmahon...!” madasigon nga nagpahiyom ang pari ngadto sa tanang nanambong.
Mikiros dayon ang tanang nanambong sa pag-inat-inat ug pagporma dayon sa gikuptan nilang dulaang lapok. Dugay nga naghinuktok si Pipo. Siya ug ang iyang asawa milanat na’g napulo ka tuig sa ilang pagpasakop sa Servant Community.
Ug sukad mahisakop si Pipo ning maong relihiyosong kapunongan, hingpit na siyang nagbag-o sa iyang kaugalingon ug kinabuhi. Gibiyaan na niya ang bisyo sa pag-inom og ilimnong makahubog, pagsugal, panghimabaye ug paghithit og shabu. Aduna nay bag-ong kausaban sa iyang kinabuhi karon, nunot sa pagpatuman sa kasugoan sa Diyos. Gipuy-an na niya ang mga pulong sa Diyos ug gipaambit usab niya ngadto sa kaigsuonan nga nagkinahanglan niini.
Unya, naporma gayud ni Pipo ang dulaang lapok. Nakapahiyom siya.
“Payong...! Usa ka payong ang akong naporma....!” nahimuot si Pipo sa iyang kaugalingon. Ang tanang nanambong sa Growth Workshop Seminar, parehas nga nakaporma na sa ilang mga dulaang lapok ug mibutyag sa hinungdan, ngano nga mao kadto ang naporma nilang butang o talan-awon. Mapagarbuhon kaayo si Pipo nga mitindog ug mipakita sa kadaghanan sa naporma niyang payong.
“Payong ang naporma ko! Giisip ko ang payong nga akong kaugalingon nga andam nang mupandong kanako, mupandong sa akong asawa ug mga anak, sa bisan unsang pagsulay sa kinabuhi, nunot sa pagsunod sa kabubut-on sa Diyos...!”
Unya, milanog ang masipang pakpak sa pari nga ginuntan usab sa mga pakpak sa tanang nanambong sa gipahigayong Growth Workshop Seminar, ngadto kang Pipo. (Kataposan)