Wala madugay, miabot sila si Elmer ug Grace sa Barangay Hingatmonan sa Balamban. Sa wala pa sila moadto sa dapit nga gihimoan sa kalingawan, mihapit usa si Grace sa ilang balay nga dili ra usab kaayo layo sa basketball court.
Gipaila-ila ni Grace si Elmer ngadto sa iyang inahan nga misugat kaniya paghunong sa habal-habal atubangan sa ilang balay. Gitug-anan ni Grace si mama niya nga dili na unta siya makauli karong hapona kun wala pa siya tabangi ni Elmer.
Nagdungan sila si Elmer ug Grace sa pagpanihapon. Mora’g pareho sila nga wala ganahi mokaon kay ingon sa nagdali nga moadto sa kalingawan.
Nadungog nila nga nagsugod na pagtukar didto sa diskohan.
“Tana Mer, sigurado ko nga daghan na karong tawo didto,” giingnan ni Grace si Elmer. Nananghid si Grace sa iyang inahan ug nanglakaw dayon sila si Elmer. Gisugat sila si Grace sa iyang mga higala pag-abot na nila sa diskohan.
Wala madugay, nagkasabot na ang magbarkada nga manayaw na sila. Nagpares sila si Elmer ug Grace. Diha pa masuta ni Elmer nga maayo diay kaayo nga mosayaw si Grace. Gihugyawan si Elmer sa mga barkada ni Grace ug gihagit nga mosukol og sayaw.
Tuod, wala sipyata ni Elmer ang paghagit kaniya sa mga barkada ni Grace.
Gipakita usab ni Elmer ang iyang abilidad sa pagsayaw. Nahimong center of attraction ang grupo nila ni Grace ug Elmer ug sila ang gitutokan pag-ayo sa katawhan.
Nalipay kaayo si Elmer sa pagtambong niya sa disco sa barangay nila ni Grace. Ang pagtambong nila sa disco nakapasamot sa kasuod sa duha. Dihang hapit na mahuman ang kalingawan, mipauli na ang grupo nila ni Grace.
Gihatud ni Elmer ang dalaga sa ilang balay. Nagkasabot sila nga mamalik sa siyudad inigka Domingo sa kaadlawon. (Sumpayan)