Human nila’g kaon, mobalik na unta sila si Rex ug Marian sa ospital diha nga nalantawan nila si Konsehal Roy Melgo nga naglakaw. “Apason nato si konsehal kay bayran nako sa iyang nagasto pagpalit og tambal ni mama,” matud ni Marian.
Nagpahiyom ang konsehal nga nagtan-aw nila ni Rex ug Marian. “Mora’g dali ra kaayo mo nga nagkasabot da. Ako unya’y maninoy ninyo sa kasal,” nangomedya ang buotan nga konsehal sa Borbon.
Pagkaugma, giadto ni Rex si Marian sa ward nga nahimutangan sa iyang inahan. “Mar, makagawas na si mama, gikasubo nako nga mahabilin usa mo dinhi sa ospital kay dili pa man makauli ang imong inahan,” ni Rex.
Nakasabot si Rex nga nasubo si Marian nga dili na sila magkauban. Gani migunit ang dalaga sa iyang kamot nga mora’g kahilakon. “Ayaw kabalaka Mar, ihatud ra nako si mama sa Borbon ug mobalik unya ko dinhi aron may kauban ka,” pasalig ni Rex dala ang pag-alam-alam sa dalaga.
Pagkaugma sa buntag, gituman g’yud ni Rex ang gisaad niya kang Marian. Mibalik gayud siya sa ospital. Naghukdong si Marian sa katre sa iyang inahan diha nga miabot si Rex ug gihikap niya ang abaga sa dalaga.
Nahaigking si Marian. “Hala, ikaw man diay,” kalit lang mibathay ang matam-is nga pahiyom sa panagway ni Marian nga nakakita sa ulitawo. Gitunol ni Rex ang gipalit niya nga juice drink para sa dalaga.
“Giingnan mi sa doktor nga mahimo na makauli si mama apan kinahanglan lagi kuno nga dili siya mahago pag-ayo kay bag-o pa nga gioperahan,” matud ni Marian. Nakahuna-huna si Rex nga hangyuon niya si Konsehal Melgo nga basin makagamit sila sa ambulansya sa lungsod.
Nagkuyog sila paingon sa out-patient department. Nasayod si Rex nga halos kada adlaw anaa si Konsehal Melgo sa ospital. Tuod wala g’yud sila mosipyat. (Sumpayan)