Mukaon na unta si Rex sa kan-anan atubangan sa Vicente Sotto Memorial Medical Center kay gigutom na siya kaayo. Lapas na alas dos sa hapon ug wala pa siya makapaniudto kay nahasiril-siril siya pagpangita sa mga tambal nga gikinahanglan sa iyang inahan nga na-admit tungod sa grabe’ng hilanat.
Nagpasalamat si Rex kay gihatod g’yud dayon ang iyang inahan sa ambulansya sa Borbon diha nga iya kini’ng gihangyo. Wala makabalibad ang nagdumala sa ambulansya dihang gigamit niya ang ngalan sa suod niya’ng higala nga si Konsehal Roy Melgo. Giswerte pa g’yud si Rex kay pag-abot niya sa ospital, nahimamat g’yud niya ang konsehal.
Mutabok na unta si Rex sa karsada apan nadungog niya ang kusog kaayo nga siren sa ambulansya. Paglantaw niya, nakita ni Rex nga ang ambulansya nga naghatod sa iyang inahan maoy nagsiren ug talisulod na sa ganghaan sa ospital. Bisan og gutom na apan mibalik siya pagsulod sa compound sa ospital aron sutaon kinsa ang pasyente gikan sa Borbon nga gihatod.
Una nga nanaog ang usa babaye nga maklaro kaayo sa iyang dagway ang dili matukib nga kabalaka. Napalingi-lingi kini nga nagbitbit og bag nga sigurado si Rex nga gisudlan kini og mga sapot. Mipahiyom kang Rex ang drayber sa ambulansya nga nakahinumdom sa iyang dagway.
“Taga diin kini’ng pasyente bai?” gipangutana ni Rex ang drayber sa ambulansya. “Sa Barangay Lugo namo na gipik-ap. Mora’g apindisaytis kay sakit kaayo ang tiyan,” matud sa drayber.
Wala’y laing kauban ang babaye. Gitutokan ni Rex ang babaye nga maayo’g hitsura apan wala lang makapangareglar sa kaugalingon. “Miss, taga Borbon ‘sab ko, tabangan tika, akoy bitbit aning imong bag para dili kaayo ka maglisod,” giingnan ni Rex ang babaye.
“Sige lang, salamat kaayo. Taga Borbon ka ‘sab diay?” matud sa babaye apan midali kini sa pagbiya kang Rex kay miatiman sa iyang inahan. (Sumpayan)