Dunay tiguwang nga mikalit lang og tumaw dinhi sa sityo Sunog-Bagol ug nagpaila siya nga taga isla Tunok-Bantol ug nia siya kay may dala siyang mga tambal ug kining maong mga tambal mao ang pinakaepektibo nga tambal alang sa mga pinaakan sa ungo, mangtas, bampira o unsa pa diha.
“Puwede ni sa pinaakan sa bitin, Iyo?” ni Kolas pa nga nangutana sa tiguwang. Mitutok ang tiguwang kaniya, mipahiyom, “para lang gyud ni sa pinaakan sa mga ungo, kanang mga sakop sa mga demonyo nga nagpuyo sa kangitngit. Unsa man, imo ning paliton, Undo, kay duna pa ko’y lima ka buok garapa ug barato lang. Tag sinto singkuwenta lang kada garapa.”
Gipalit ni Kolas ang usa ka garapa. Iyang giablihan ang gamay’ng takob ug gisimhotsimhot ug midiyong ang iyang mga mata. “Kaisog ba diay’g baho niini, Iyo,” niya pa. “Oo,” mubong tubag sa tiguwang. “Basta ipasalig ko nimo, Undo, nga dili masayang ang imong sinto singkuwenta. Nakadungog ko’g tabi-tabi nga daghan kunong ungo diha sa pikas sityo, sa sityo Gamot-Kasya. Pero, way problema kay duna ka na man anang tambal. Basta kon duna kay samad hidhiri lang ana, o sige, adto na ko.”
Pagka-gabii may nabati si Kolas nga tingog sa wakwak. Diha ra sa may punoan sa tambis magwakwak. Mikamang si Kolas ug iyang gilili sa giwang sa bungbong ug maoy iyang nakita sila si Kompare niya Ige ug ang iyang asawa nga si Insiang. Ug kay hayag ang buwan klaro kaayo nagtutok sila sa may bentana nilang Kolas.
“Pare Kolas, si Ige ni, Pre,” sangpit ni Ige. “O, Pre, unsay tuyo, gabii na man?” ni Kolas pa. “Kanaog lang una, Pre, kay duna mi tuyo nimo,” ni Ige.
Nanaog si Kolas ug mipaingon sa nahimutangan sa iyang Kompare kuyog sa asawa niini. “Unsa may tuyo nimo nako, Pre?” ni Kolas. Kalit lang nga gikuptan ni Ige ang bukton ni Kolas ug hugot kaayo ang pagkakupot. Milugnot si Kolas ug nakita ni Kolas nga tag-as ang ilang mga kuko.
“Pre, adto sa balay, nagluto ko’g lamiang sud-an. Tana, Pre, inom-inom ta didto, duna ko’y bino nga akong gipalit,” ni Ige pa ug nangalkag ang iyang buhok.
“Dili ko, Pre, ugma lang ta sa buntag mag-inom, kay wala ko sa kondisyon ron,” ug mibiya si Kolas. Sa didto na siya sa taas nabati ang tingog sa wakwak nga nagtubag-tubag sa may ibabaw sa tambis. Ug mora’g nabatyagan niya nga mihapdos ang dapit sa gikuptan ni Ige ug nakita ni Kolas nga dunay samad, nagdugo kini. Tungod tingali kay nalubong ang kuko nga tag-as ni Ige sa iyang bukton ug sa iyang pagbira nagadlasan kini, apan ngulngol nga kahapdos ang iyang gibati ni Kolas. Tuod, gikuha niya ang tambal nga gibaligya sa tiguwang kaniya ug gihidhiran ang samad nga agi sa kuko. Mitikuro si Kolas sa kahapdos ug iyang nakita nga kadali ra kining naalim. Nahanaw ang samad ug mora’g nauwat dayon. Karon, nasabtan na ni Kolas nga sila si Kompare niya Ige ug ang iyang asawa, mga mangtas diay nga ungo. Likayan na niya ang iyang kompare. (Kataposan)