Labihang sadyaa Asyat sa atong silingan nga sila si Rico ug Minda nag-aso gud ilang balay sa gilutong sud-an nga mga lamian, nakatuaw si Badong ngadto sa iyang asawa nga si Asyat usa ka udto niana.
“Bitaw no daghan sila’g mga bisita ug mga sapian sab kay sinaw gud og mga sakyanan ug mga ispoting sa ilang panapot,” temang ni Asyat.
Tubig-tubigan sila si Rico ug Minda sa ilang baryo kay dunay dakong tindahan sa lungsod ug yutaan sab.
Apan mata-pobre silang pagkatawo. Magpanuko og duol ang ilang silingan kay kahibalo na sa batasan nila.
“Kun dunay moduol nga silingan panahon sa kalisdanan balibaran dayon ug insultohon pa g’yud kay lagi “busy” sila sa ilang negosyo.
Samtang si Badong kakha-tuka mangingisda lang. Makapalit sila’g bugas kun may kuha siya sa iyang panagat.
Kun wala’y kuha gidemalas magtughong o maglugaw ba nuon uban sa ilang batang gamay nga si Botyok nga hilabihang niwanga kay kulang sa sustansya ug pagkaon. Gumikan sa ilang kapordoy wala gyu’y mo-imbitar kanila. Miligid ang mga adlaw, unsang hitaboa nga nagkabang man ang tingog ni Minda sa pagsinggit sa usa ka kaadlawon niana.
Singgit pa ni Minda, “Tabang mga silingan nasunog mi dako kaayo ang kayo!” Dili makatabang ang mga silingan kay nababoy kon na-trap sila sa sulod kay gialihan mag-puthaw ilang bentana ug kinoral sab og semento ang ilang balay. Nagkaawop ang tingog nilang Minda ug Rico kay gilamoy sila sa kayo! Nangapaig sila sa sulod sa ilang balay. (Kataposan)