Sagbay-luwag
Nakakita diay ang dalagita sa daghang kuwarta ni Narding dihang gihabwa niya kini gikan sa pitaka kaganina ug iyang giihap. Mao diay nga nakaingon ang dalagita nga daghan siya’g kuwarta.
May nahuna-hunaan si Narding. Gipangutana niya ang dalagita sa iyang ngalan ug sa laktod, nagka-amigo sila’ng duha. “Unsa diay imong paliton Melody nga manghuwam ka man og kuwarta sa imong ig-agaw?” gipangutana ni Narding ang dalagita.
“Ilisan unta nako kini’ng akong selpon Nong Narding kay gubaon na. Ingon man si Papa nga ilisan ra kuno niya kun magpadala na siya og kuwarta karong tapos buwan,” matud ni Melody. Nasayran ni Narding nga sa abroad magtrabaho ang amahan ni Melody.
“Sige amiga na man ta, i-celebrate nato ang atong panag-amiga, palitan tika’g bag-o nga phone,” giingnan ni Narding ang dalagita. Napasiga ang mga mata ni Melody nga nakadungog.
“Tinuod ka nong Narding nga imo ko’ng palitan?” sa dalagita pa nga wala makapugong sa pagpahiyom. “Wala ko magkomedya. Apan ayaw na ko tawga og manong kay matiguwang ta ana,” matud ni Narding.
Nagkasabot sila si Narding ug Melody nga mangadto’g baligyaanan og selpon. “Sige, unya angkas lang ko nimo ha?
Wala g’yud magtuo si Narding nga moabot kini’ng mao nga sitwasyon nga miangkas sa iyang motor ang maanyag nga dalagita. Samtang nagdagan ang motor, nagkalingaw og sultihanay sila si Melody ug Narding.
Tingali walay malisya alang sa dalagita, gipilit niini ang iyang lawas sa buko-buko ni Narding. Gibati og talagsaong kahinam si Narding kay gibatyag niya ang nagkabag-id nilang mga lawas.
“Unya, human tika mapaliti og Android phone, asa man ta paingon?” gipangutana ni Narding si Melody. Milingi og gamay si Narding aron madungog dayon niya kun unsay tubag sa dalagita. (Sumpayan)
- Latest
