Gula 7
Nasubo ug naguol ko tungod sa sabot namo ni Edward nga magkita sa Baybayon Beach Resort karong adlawa. Nakaseguro kong magpaabot gyud siya nako didto. Hinuon, gipasidan-an ko na man siya nga dili segurado kun makaadto ba ko sa Baybayon Beach Resort. Busa kun mabawo man siya’g pinaabot nako, nagtuo kong makasabot ra si Edward sa hinungdan nga wala ko makatunga sa among sabot.
Alas diyes ang takna sa kabuntagon nagsunod pagpangabot ang among mga bisita. Mga kauban ni tatay Metodio sa trabaho ang nangabot. Nangaon sila ug nag-inom. Nagkapuliki si nanay sa pagsilbi sa mga bisita ni Tatay maong giabagan ko siya.
“Unsa diay okasyon, Nay, nga giduaw man si Tatay sa iyang mga kauban sa trabaho? Gipangutana ko si Nanay samtang didto mi sa kusina.
“Na-promote ang imong Tatay, Jezebel,” ni nanay pa, “maong gidapit niya ang iyang mga kauban sa trabaho aron mag-celebrate sila.”
Hapon nang namauli ang among mga bisita. Misulod ko sa akong kuwarto pagkahuman sa panihapon aron mopahulay. Samtang naghigda ko may nanuktok sa akong kuwarto. Akong giablihan. Si Edward! Ug akong gipasulod.
“Nganong mianhi ka man gyud?” Giingnan ko siya. “Dili ko mahimutang kun dili ta magkasulti,” niya pa. “Gimingaw ko nimo.” Nakapahiyom ko’g hilaw sa akong nadungog. -- Sumpayan pa