Gula 257
Daklit nagkumostahay sila si Rey ug Danica. Nagpakisayod si Danica sa hinungdan sa kalit niyang pagkahanaw sa tambalanan apan naglikay si Rey sa pagpakigtubay niini. Wala na lang magdaghan pagkutikuti ang maanyag nga dalaga.
Usa ka higayon niana, may operasyon sila si Rey. Ilang gisulong ang giluklokan sa mga tawo nga nagkarnap sa sakyanan sa usa ka insek nga magpapatigayon sa dakbayan sa Sugbo. Napatay nila ang mga karnaper ug nabawi nila ang awto nga gipanag-iya sa Insek.
Gumikan sa maong hitabo, ang ngalan ni Rey nabaniog na usab sa tibuok dakbayan sa Sugbo.
Napulos siya pagdayeg sa mga magsisibya sa radyo ug sa mga kolumnista sa mantalaan. Nabutang sa headline sa mga mantalaan ang iyang ngalan uban sa iyang mga hulagway.
Usa ka hapon niana nga hapit na mogawas si Rey sa presinto, gitawag siya sa dishman. May nanawag kaniya sa telepono.
Gipakigsultihan ni Rey ang nanawag. Ug wala niya kapugngi nga mobati’g kahikugang. Si sister Veronica diay ang diha sa pikas linya.
“Giunsa mo pagkasayod nga mibalik na ako dinhi?” Wala makapugong sa pagpangutana si Rey.
“Nabasahan ko ang imong ngalan sa newspaper,” laktod nga tubag ni sister Veronica. -- Sumpayan pa