Si Warsaw usa ka iro nga Kalago. Laki. Puti iyang balhibo nga mora’g sa karnero. Motag-as ang dapit sa nawong nga usahay modunghay. Buotan ug maalam si Warsaw. Iyang paghot mora’g sulti paminawon usahay. Gisulod siya’s tangkal. Sukad niabot ang bag-ong nangabang nga magtiayon sa usa ka lawak sa balay sa tag-iya ni Warsaw, nausab iyang panglihok.
Usa sa hinungdan nga gitangkal si Warsaw, ang pagkabalhin sa iyang loyalty. Di na siya moduol o motagad sa iyang tag-iya nga magtiayong Adela ug Marvin. Adto na mokitoy iyang ikog sa magtiayong Charlie, usa ka CPA, ug Marita nga sekretarya ni Charlie. Bag-o lang silang nipuyo sa lawak sa ground floor sa dos andanas nga balay nilang Adela ug Marvin.
Kun dunay sakyanan gawas sa gate, unya magbusina kay gustong mosulod ang nagsakay, di moundang og paghot si Warsaw, kun di makasulod ang sakyanan. Daw magtawag siya sa maid nga paablihan ang gate. Unya, inig sulod sa sakyanan, sundon ni Warsaw. Inig parking sa sakyanan, iyang ihian ang ligid sa abante sa toong habig. Matud pa sa mga animal psychologist, ang pag-ihi maoy pagmarka sa iro nga giangkon niya ang sakyanan.
Inig kanaug sa sakyanan ni Charlie ug Marita, mohigda si Warsaw sa yuta. Magpaugay sa iyang tiyan. Mora’g baboy nga magpa-igad. Hapohapon dayon ni Charlie ang tiyan sa iro, ginamit ang toong tiil. Magpiyong-piyong si Warsaw nga mora’g katulogon. Kadaghanan na nahitabo nga gisampit ni Marvin si Warsaw. Wa niduol. Wa nikitoy’ng ikog.
Unya nakamatikod ang tag-iya nga abtik si Warsaw nga moduol sa mangangabang inig uli gikan sa ilang opisina. Ang mga maid maoy daling makasabot kun nganong nausab ang lihok sa iro. Ang maid sa nangabang nga si Lenlen, ug ang maid sa tag-iya nga si Elvie, daling nagkahigala.
“Ang akong mga amo kun manglakaw, di magbilin og pagkaon sa maid. Labi pang way makaon ang iro. Maayo pa imong amo. Pinangga ang hayopan. Labi pa ang maid, nga tawo” ni Elvie.
“Nganong gitangkal man si Warsaw?” ni Lenlen. “Nangigi ang tag-iya kay wa na tagda sa iro. Lain nang tawo ang gitagad” ni Elvie. “Kalooy ni Warsaw” ni Lenlen. (Katapusan)