Isla Paraiso

Gula 220

Nalipay si sister Veronica nga paglabay sa usa ka semana mahimo nang pakigsultihan si Rey.

“Pagpakaayo’g dali, Rey,” nagkanayon si sister Veronica nga mihapuhap sa agtang sa lalaki. “Daghan kaayo kita’g panagsultihan unya kun baskog ka na.”

Wala motingog si Rey. Igo lang kining mitan-aw kang sister Veronica nga nagbarog sa kilid sa kama nga iyang gihigdaan.

“Daghang salamat sa pagluwas mo sa akong kinabuhi,” matud na usab ni sister Veronica. “Wala ako masayod kun unsaon ko pagbayad ang dako kong utang kabubut-on diha kanimo.”

Wala gihapoy mga pulong nga nanglusot sa mga ngabil ni Rey. Kutob lang siya sa pagtutok sa maanyag nga panagway ni sister Veronica. Unya gipiyong niya ang iyang mga mata.

Apan nakita ni sister Veronica nga may mga luhang miuliot paggawas gikan sa gitikyop nga mga mata sa ulitawo. Gitupsan sa kaluoy ang balatian sa madre samtang nagtan-aw kang Rey.

“Mogawas una ko’g kadiyot, Rey,” namulong si sister Veronica pagkilab sa pipila ka gutlo. Nasayod siya nga namati si Rey kaniya. “Mihilab ang akong tiyan sa kagutom. Mopalit una ko’g pagkaon sa gawas. Apan mobalik dayon ko.”

Dayon mihinay siya paggawas sa lawak. Gitak-opan niya’g hinay ang pultahan sa wala pa siya mobiya sa lawak. -- Sumpayan pa