Gula 200
Nasayod si Rey nga nakapangandam na karon ang mga kaaway sa iyang pag-abot. Nakaseguro siya nga nakamatikod na sila sa iyang pagpaduol.
Apan bahala na. Kalit niyang gipadagan ang dyip ug gipadasmagan ang pultahan nga puthaw.
Milagubo ang pultahan nga puthaw nga gidasmagan sa renegade jeep nga gimaneho ni SPO3 Rey Corpuz.
Sa dihang nakasulod na ang sakyanan sa tugkaran sa karaang bodega, misunod gilayon pag-alingawngaw sa kalikopan ang nagkadaiyang buto sa mga armas. Gipusil sa mga kaaway si Rey.
Apan wala usab magpabentaha si Rey. Ginamit ang iyang Uzi, nagpunay usab siya’g pabuto samtang padayon nga gimaneho ang dyip nga iyang gisakyan. Maoy girumbo ni Rey ang seradong pultahan sa bodegang karaan.
Ang mga bala nga gibuga sa mga armas sa mga kaaway wala makababag kang Rey. Nakasulod gayod ang dyip nga iyang gisakyan sa bodega human niya padasmagi sa sakyanan ang pultahan.
Paghisulod gayod sa sakyanan, kalit kining gipahunong ni Rey ug midali siya pag-ambak. Midiretso siya pagligid kay wala gayod siya lung-i pagpusil sa mga kaaway.
Sa dihang nakakita og higayon si Rey, mibalos siya pagpabuto. Tulo gilayon ka kaaway ang dihadiha napunggit sa mga bala nga giluwa sa iyang Uzi. (Sumpayan pa)