Dear Tita Salie,
Maayong adlaw. Tagoa lang ko sa ngalan nga Janet, 32 years old, from Bogo, Cebu.
Minyo ko, Tita Salie, ug dunay tulo ka buok anak. Nagproblema ko karon tungod kay naka-uyab ko og usa ka tomboy.
Love kaayo ko niining maong tomboy. Kanunay mi nga magkita sa tagotago lang. Kun dili mi magkita manawag lang siya sa celfon.
Naanad gyud ko nga anaa siya, Tita Salie. Ug kulang na ang adlaw kanako kun dili ko siya maka-estorya o makita. Apan ang problema karon kay dili na man siya makigkita nako ug panagsa na lang sad siya mo-text. Kanunay na baya ko nga mangita kaniya, Tita. Unsa may akong buhaton? Palihog pasabta ko. Thank you.
* * *
Hello Janet,
I think nauna diha sa imong kinabuhi ang imong bana ug ulahi na nga miabot ang imong tomboy nga gihigugma. Apan nganong adto man ka sa tomboy mangita ug dili man ang imong bana? Ayaw paabota nga mawagtang ang imong bana aron diha ka pa mangita kaniya.
Samtang anaa pa ang imong bana ug kamo pang duha ang magkauban atimana siya ug siya ang kanunay pangitaa diha sa imong kinabuhi ug ayaw ang laing tawo. Ayaw pangita og problema kun linaw ang inyong pagpuyo uban sa imong bana. Anara ang imong kaugalingon uban ang imong pamilya kay sila ang tinuoray nga nagmahal ug andam silang mounong kanimo sa tanan nimong kagul-anan.
Mas maayo kun wala na makigkita kanimo ang tomboy aron dili na ka maglisod paggawas sa maong relasyon nga imong gitago sa hilom.