Dear Tita Salie,
Have a wonderful day. Just call me Jeremias. Magpatambag unta ko nimo mahitungod niining akong problema karon.
Duna ko’y uyab, Tita Salie, apan iya kong gibuwagan tungod kay nakasala man ko niya. Nakasala ko niya apan wala man nako tuyoa nga makasala ko.
Apan dili na man gyod siya madala og hangyo ug nakigbuwag gyod siya nako. Karon nawad-an ko og gana sa akong kinabuhi ug dili na ko makatulog. Kun atua ko sa trabaho siya ra gyod ang anaa kanunay sa akong hunahuna, Tita Salie.
Unsa kahay maayo kong buhaton aron nga magkabalik mi? Palihog intawon pasabta ko. Daghang salamat sa pagtagad ning akong problema.
* * *
Good day, Jeremias,
Ang usa ka failure sa gugma wala magpasabot nga mohunong na usab ang imong kinabuhi. Ug palihog usab ayaw i-focus tanan nimong attention ngadto sa imong pagbati tungod kay aduna pa kay daghang butang nga angay atimanon.
Pasagdi una siya sa iyang desisyon. Bisan kun wala nimo tuyoa ang maong sala apan seguro naapektohan siya ug nasakitan ug duna kini epekto ngadto kaniya tungod kay nahigugma man siya kanimo.
Hatagi una siya’g space ug time aron maghunahuna og mag-ayo sa kasakit sa iyang dughan. Hinuon, imo siyang pakigsultihan aron imong mahibaw-an kun andam na ba siya nga inyong ibalik ang inyong gugmang gigambalay. -- Tita Salie