Isla Paraiso - Gula 122

“Mao diay nga dili mahimong dili mo siya makita sulod sa usa ka adlaw, Sir,” nagkanayon si Benturada nga ang mga mata didto sa unahang karsada nga ilang gisubay, “kay pang Miss Universe man diay ang beauty nianang imong sweetheart nga madre.”

“Tinuod nga matahom gayod siya, Benturada,” ni Rey pa, “ug buotan pa gayod. Tinud-anay gayod kining ako ngadto kaniya.”

“Ngilngig ka sab manguyab, Sir, da,” nakaingon si Benturada. “Dili ka man mopili og dili madre.”

“Daan na kong nangulitawo kaniya, Benturada, sa wala pa siya magmadre. Karon gipadayon ko ang pagpangulitawo kaniya bisan og usa na siya ka madre. Gikaluy-an tingali sa Diyos, gisugot niya ako ug mogawas na siya sa kombento.”

Unya kalit naputol ang panagsulti sa duha ka polis sa dihang kalit mitingog ang hand set nga diha sa hawakan  ni Benturada.

Samtang naggunit ang walang kamot sa manibela, gikuha ni Corporal David Benturada ang hand set gikan sa iyang hawakan ug gitubag ang nanawag.

“Yes, this is Bravo 1,” tubag ni Benturada. “Go ahead, Base.”

“Proceed immediately to the headquarter Copy?”

Ug gipahunong pagpadagan ni Corporal Benturada ang renegade jeep nga ilang gisakyan. -- Sumpayan pa