Gikuyogan sa iyang mga ginikanan si Brendo nga nangunsulta ni Atty. Harry Lapawong. Gipasagdahan lang una si Brendo sa iyang papa Hector ug mama Miriam, nga maoy moasoy sa iyang problema ngadto sa abogado. Dunay nakaila, nahigala ug nauyab si Brendo. Silingan niya og lawak sa boarding house, si Marly samtang nagtungha og Accountancy si Brendo. Duha ka tuig na silang kaila. Apan unom ka buwan pa lang nga nagkauyab. Pagkamabdos ni Marly, gipugos niya si Brendo nga magpakasal. Kay kun dili, ikiha siya.
“Pila’y edad sa babaye?†ni Harry. Nanghilogpoy sa iyang gilingkuran sulod sa bupete nga bugnaw og aircon. Nitutok ni Brendo nga naglingkod sa lingkuranan dikit sa lamesa sa abogado. Ang iyang mama ug papa tua lingkod sa sopa dikit sa bongbong sa bupete apan makadungog ra sa gipanagsultihan sa batan-on ug sa abogado. “22. Pero pagkauyab namo, niingon siya 19 pa siya. Giparehaan niya akong edad†ni Brendo. “Bakakon diay nang bayhana. Di kasaligan†ni Harry. “Bakakon gyud. Nakita man nako iyang date of birth sa iyang transcript of scholastic records†ni Brendo.
“Pila ka bulan na man siyang buntis?†ni Harry. “Unom ka bulan na†ni Brendo. “Insakto na?†ni Harry. “Mao may iyang pulong. Unya gipa-checkup gyud namo sa doctor. Sakto nga unom, matud sa doctor†ni Brendo. “Imo kaha iyang gimabdos?†ni Harry. “Duda ko attorney†ni Brendo. “Nganong nagduda man ka?†ni Harry. “Akong gikwentakwenta, wa pa may unom ka bulan, sukad ko nakahilabot niya. Labing seguro, tulo ka bulan pa ang una nakong sex niya. Unya kun unom ka bulan na siyang buntis, dili gyud na ako†ni Brendo.
“Unya nganong nangunsulta pa man ka’g abogado?†ni Harry. “Gusto lang ming masayud attorney, kun duna ba ko’y kasong criminal atubangon, kun di ko mangasawa ni Marly†ni Brendo. “Kun imo siyang gi-rape, criminal na. Pero sa akong banabana, iya lang kang gipatilaw niya aron ikaw makaangkon sa iyang gisabak. Basi’g nisibat na ang tinood nga amahan sa bata†ni Harry. “Duna may mga higayon nga maghinuktok siya. Di magtingog. Unya wa gyud nitug-an nako kun unsay iyang problema. Mao gyud tingale ning problemaha†ni Brendo. “Nakatilaw ka na ba’g sex og babaye sa wa pa mo ni Marly?†ni Harry. “Wa pa gyud. Siya pa†ni Brendo. “Suheto na na si Marly parti sa sex. Ug nakamatikod siya nimo nga virgin, di kaila’g virgin o haniti sa sex nga babaye. Gibiktima ka lang niya†ni Harry.
“Unsa ra may among buhaton, attorney?†hapit magdungan ang bana’g asawa. “Paghuwat lang mo kun mokiha ba gyud tinood si Marly. Posible mokiha’g civil case, breach of promise to marry. Kuli nga mokiha’g criminal. Naa na man roy DNA testing. DNA sa bata ug ni Brendo, seguradong dili mo-match†ni Harry. “Unya, mopadayon pa ka’g pakasal?†ni Hector. “Dili na oy!†ni Brendo. Nakapahiyom. “Magpakasal na man lang siya. Kay nahadlok og ikiha†ni Miriam.
“Ayaw kahadlok anang kiha. Lisod pagprobar anang iyang nahunahunaan†ni Harry. Nakabuhi og lawom nga panghupaw ang mga ginikanan ni Brendo. “Salamat kaayo, attorney†ni Brendo. Nitunol og tibook usa ka libo ka pesos sa abogado. (Kataposan)