Ang dumuduong nga niabot atol sa tingpaniudto

Sa usa ka dapit sa Mindanao, malinawon na unta nga nanimuyo ang ex-convict nga si Baldo isip usa ka mananagat uban sa iyang kapuyo nga si Alessandra. Wala pa kini usa ka tuig nga nakagawas gikan sa Muntinlupa Bilibid Prison sa kaso nga kawat ug pagpanguot. Sa dihang nakabalita kini nga taliabot na ang Pista Senyor kalit nga may mitumaw nga dili maayong laraw sa galamhan niini.

Sa tubaan ni Manoy Aying daplin sa baybayon. Nagkalingaw og inom sila si Baldo uban sa mga kumpare niini nga sila si Joel ug Larry. Pulos usab mga mananagat.

“Mao kana mga pare, karon nga nagsingabot na ang Pista Senyor nakahukom ko nga molarga padulong sa Sugbo. Gipul-an na ko sa kinabuhing mananagat, na miss na nako ang thrill isip naa sa underworld,” matud ni Baldo dayong tungab sa iyang tagay.

“Uy pareng Baldo kaayo na lang unta diri sa ato, malinawon kaayo ug maayo ang lakaw sa panagat,” matud ni Larry nga bag-o pang nakahuman og higop sa sabaw sa linarang nga bakasi. Unya midason si Joel, nga nag-ipis sa bag-ong dawat nga tuba.

“Unya pre, kinsa man ang imong dangpan didto sa Sugbo, ug mag-unsa na lang unya si Alessandra nimo? Imo lang kini nga biyaan.”

“Wala kana’y problema pre, adto ko dangop sa akong higala, ang gikaintapang mangunguot sa Sugbo nga si Castor, ug ang akong si Alessandra kun gusto mo, inyo na.” Nanghugyaw og pangatawa ang tulo.

“Nilutaw gayud ang tinuod nga kolor ni Baldo, ang iyang pagkasalbahes,” nakatuaw ang kaganina pa nga nagpaminaw lang nga si Manoy Aying.

Samtang naglawig na ang barko nga gisakyan ni Baldo, ang M/V Jay-R, padulong sa Sugbo, nanumbalk sa iyang panumduman ang kangilngig ug ang talagsaong abilidad sa iyang higala nga si Castor kun parte na og pagpanguot ang hisgutan. Una kini kaniya og usa ka tuig nga nakagawas sa Munti. Sa dihang didto pa sila sulod sa bilanggoan, respetado usab kaayo kini tungod sa kaisog ug sa pagka-manggialamon niini. Si Castor ra ang wala malisang sa grupo ni Bigtime Bobby, ang ig-agaw ni Baby Ama didto sulod sa bilanggoan. Nagtingsi si Baldo nga naghunahuna sa limpak limpak nga salapi nga ila unyang magordo ni Castor. Matagbaw ug makapatuyang na unya siya og maayo sa iyang mga bisyo. May mibathay nga daw ngisi sa buaya sa panagway sa ex-con ug ang mga siga nga mata niini nagpunting sa direksyon sa Sugbo ug dungan sa kalit nga paghuros sa bugnaw nga hangin, nakatuaw kini.

“Baldo is coming to town. You better watch out. You better not cry.” Unya may nilanog nga sipa kaayo nga liti.

Nakahukom si Baldo nga bisan unya og liwas na ang Pista Senyor, anhi siya magbase sa Sugbo. Sa iyang hunahuna wala kini problema basta makasandig lang siya ni Castor. Pero kumusta na kaha si Castor. Buhi pa kaha? Wala tuyo-a nga gikulbaan si Baldo.

Sa dihang nakadunggo na ang barko nga gisakyan ni Baldo sa pantalan sa Sugbo, wala maglangay nidiretso dayon kini sa Labangon nga maoy address nga gihatag kaniya ni Castor. Gisulat pa gani kini sa potos sa sigarilyong Liwayway. No. 143 Kroded St., Labangon, CC. Iyang gipangutana ang dalagita nga namaligya og siomai sa may eskinita, kabahin ni Castor.

“Aa... si Pastor, naa ra diha sa ikalima nga balay, gikan dinhi,” matud sa dalagita.” P-Pastor, nakatuaw si Baldo, sa iyang hunahuna, basin may pagkabungol siguro ang dalagita.

Samtang nagkaduol si Baldo sa ginaingon nga balay, may nabati siyang awit, awit nga dili pareha sa kasagaran niyang mabati sa mga beerhouse. Mananoy nga awit nga daw mibayaw sa iyang diwa, mora og nigaan ang iyang paminaw. Wala tuyoa niini nga niipon siya sa pundok sa mga tawo nga nanagbarog sulod sa lagwerta. Pulos kini mga desente og pamiste, nagsul-ob ug lubos puti. Wala masayod ang irehes nga si Baldo nga mao kadtoy usa ka prayer meeting. Paghunong sa awit may namulong dapit sa atubangan, ug pagyanghod pa ni Baldo maoy iyang nakita ang usa ka pamilyar nga panagway.

Wala tuyoa ni Baldo, wala siya makasabot sa iyang gibati ug kalit kini nga mingaab,” C-castor usa ka na ka Pastor! Hu! hu! hu!” (Katapusan)