Isla Paraiso

Gula 54

“Dugaydugay na kitang nagsultihanay, Rey. Katulogon na ako,” matud ni sister Veronica.

“Pasayloa nga natugaw ko ang imong pagpahulay,” ni Rey pa. “Sige mopauli na ko.”

“Pag-amping.”

“Apan may ihangyo lang unta ako kanimo nga gamay’ng pabor, sister Veronica.”

“Unsa man kana, Rey?”

“Mahimo ba nga ihatag mo kanako ang kahigayonan nga makapamisita kanimo dinhi sa kombento...nga dili mo na ako likayan ug atubangon mo ako sa higayon sa akong pagpamisita?”

Wala dayon makatubag si sister Veronica. Nakalitan siya sa pangutana ni Rey. Wala siya masayod kun unsay angay niyang itubag. Nahiunlod siya sa halawom nga pagpamalandong. Gipiga niya ang iyang tampihak.

“Mahimo ba ang akong gihangyo, sister Veronica?” Misukot  si Rey taliwala sa kahilom sa madre.

Wala’y tubag. Si sister Veronica mipalihok sa iyang hunahuna. Ang tinuod gusto kaayo siyang makigsulti sa iyang kababata ug katalirongan nga si Rey. Apan ang suliran kay mangulitawo man kini kaniya. Bentaha unta kadto’g partikular lang nga mga butang ang ilang hisgotan. Dili siya buot nga maapektohan ang iyang pag-alagad sa Diyos sa pagpaninguha ni Rey kaniya mao nga gusto unta niyang likayan ang lalaki. -- Sumpayan pa