Gula 44
Nianang pagkasunod gabii, human sa trabaho ni Rey sa buhatan sa kapolisan, mihapit gihapon siya sa Orchids Sisters Convent. Apan wala gihapon magpakita si sister Veronica kaniya. Kuno may importante kining trabaho. Dili magpatugaw.
Niini, nakasabot si Rey nga si sister Veronica buot nang molikay kaniya sa hingpit.
Mipauli si Rey sa balay nga iyang giabtan sa Mambaling nga huyhoy gihapon ang mga abaga. Masulob-on kaayo ang iyang hitsura. Nganong gibuhat man kini ni Veronica kaniya? Sakit kaayo alang kaniya ang gibuhat sa madre. Sama sa gihikawan siya ni sister Veronica bisan sa pagtan-aw sa kaanyag niini.
Wala pakatulga si Rey sa kahasol nga misunggal kaniya. Ang iyang hunahuna didto ra kang sister Veronica. Dili siya makadawat sa gihimong paglikay sa madre kaniya. Dili siya makatugot nga maglikay na kini kaniya hangtod sa hangtod.
Lawom nang gabii sa dihang migawas si Rey sa balay sa iyang gikaserahan kay dili gayod siya makatulog gumikan sa kahasol. Dili na daghan ang mga sakyanan nga nagdagan sa halapad nga Natalio Bacalso Avenue. Milabang siya sa dalan. Maoy iyang girumbo ang usa ka imnanan nga nag-abli pa. Misulod siya. Buot niyang lumsan ang iyang kaugalingon sa ilimnon nga makahubog.
Sa usa ka bakanteng lamesa ug lingkoranan nga nalayo og diyotay sa ubang mga kustomer mipahiluna si Rey sa iyang kaugalingon. Dili na sab kaayo daghan ang mga kustomer sa sulod sa maong imnanan. -- Sumpayan pa