Sugod sa unang rawon ngadto sa kataposan, gihimong punching bag ni Manny Pacquiao si Brandon Rios sa ilang panagsangka didto sa Cotai Arena sa The Venetian Hotel and Casino, Macau, Tsina niadtong miaging Nobiyembre 24, Domingo (sa ato).
Klaro kaayo sa mga mabinantayong mata kun unsa kadaghan ang solid punches ni Manny nga pirmeng mopatulingig ni Brandon sa ilang panagsinukliay’g mga suntok. Matag kumo nga motugpa sa nawong, manglupad ang suliyaw sa kakulba, kahinam ug kapamapanganduyon gikan sa minilyong misaksi nga unta patikangkangon sa gamay’ng Pinoy ang higanteng Mexican-American nga brawler.
Ultimong si Miguel Cotto, kinsa didto maglingkod sa atubangan sa ring, wala mahimutang. Dinhay kahingawa nga miluta sa iyang panagway. Ingon sa nahadlok siya unsay mahitabo ni Rios nga sige la’g kamumo sa daw batong mga kumo ni Pacquiao. Na-relate ni Cotto kadtong pagkaguba sa iyang nawong human martilyoha sa mga suntok nga dili makita pero kalit lang motugpa sa iyang apapangig niadtong higayon nga nagkabagat ang ilang duha ka dalan ni Manny ibabaw sa wala moginhawang kanbas nga ilang gitumban.
Tungod sa dili na masagang nga nagpungasing suntok ni Manny, gilabayan si Miguel og puting tualya sa iyang trainor timaan sa pagsurender. Butang nga nakapabalaka ni Cotto. Nga basig ang iyang natilawan, matilawan sab ni Rios. Nga basig hamis nga nawong ni Rios mahimo nang aping sa durian o nangka.
Apan natapos ang pinaleng hugna sa away nga wala gyud mapahawok ni Manny si Brando sa kanbas. Luyo sa kadaghang solidong kumo nga girakrak sa Pambansang Kamao ngadto sa bodega ug sa nawong ni Rios, wala gyud mahagsa ang Mexican-American sa nagpanglad-ok nga sawog.
Nagpasabot ba kini nga sama kalig-on ang lawas ug nawong ni Rios sa batong panas? Busa, kaya rang kan-on ang mga bug-at nga kinumo ni Manny? Or, tungod ba kaha kay ang kakusog sa mga sumbag ni Pacquiao, dili na sama kapintas kanhi sa medyo batan-on pa siya, diin iyang giparetiro si boxing legend, Oscar de la Hoya? Kun ang kakusog sa mga suntok ni Manny kaniadto nahisama kabangis ni Yolanda, tingali ning panagtagbo nilang Rios, mora na la’g Ruping. Sa laktod, ang kapaspas ug kaigmat ni Pacquiao, anaa pa. Ang kakusog, anaa pa gihapon. Apan...mibahar na!
Hinuon, may miingon nga gituyo ni Manny nga pahinayag diyotay ang kakusog sa iyang kumo, kay kontra kuno sa iyang relihiyon ang makapasakit og tawo. Ikaduha, labaw na siya pirme sa puntos halos matag rawon. Busa, di na kinahanglan nga pahaplaon pa niya si Rios. Kay basig sa iyang pagdutdot, matsambahan pa hinuon nga siya si Manny maoy ma-TKO. Kontento na si Pacquiao nga ning iyang pagsubang pag-usab human siya moawop, walay kinabuhi nga nakalas. Ug mao ni rason nganong wa matumba ni Pacquiao si Rios.