Domingo. Kilumkilum. “Si Melody! si Melody! Giuli na!†singgit sa mga batan-ong katalirungan ni Melody, 16 anyos.
Pagkadungog sa magtiayong Melchor-Agnes, nilili sila’s bintana aron pagtan-aw kun hain si Melody. Nagkugos si Agnes sa ilang panganay nga si Verna, 2 anyos.
Ig-agaw ni Melchor si Melody nga gihimo nilang tigbantay sa ilang anak samtang ang magtiayon tua’s munisipyo nag-alagad isip kawani. Unya naabtan na lang nila sa miaging Biyernes sa hapon si Verna nga naghigda sa sawog, mao na lang usa. Nahanaw si Melody. Tulo ka adlaw siyang nawala.
Nagpatabang sila’g albularyo nga si noy Tasyo. Si noy Tasyo ang naghimo’g mga halad ug seremonyas tungod sa dako ug habog nga punoan sa kolo atbang sa ilang balay. Kay ang kolo palasyo kuno sa mga engkanto.
Ug si Melody naibgan sa prinsipe sa mga engkanto nga ginganlan og Gaspar. Nipasalig si noy Tasyo nga mobalik ra si Melody dangta’g tulo ka adlaw.
Tuod man, nakita nila si Melody. Nagsukad sa tumoy sa punoan sa Kolo. Wa nahulog. Wa nagtungtong o naggunit og sanga. Nanaug siya nga mora’g nagsubay og hagdan, apan di makita. Yano ra kaayo ang iyang pagkanaug. Sama lang siya sa wa ray nahitabo.
Paglusad sa yuta, gitapok-an si Melody sa mga batan-on niyang higala ug silingan. Gisundan siya sa mga batan-on nga alang-alang mahadlok o mahibulong sa pagtumaw niya ibabaw sa kolo.
“Nisaad si Gaspar nga dili na ko niya samokon. Kay nahadlok siyang noy Tasyo†ni Melody paghisaka niya sa pantawan sa ilang Melchor nga mahinangpong nisugat sa dalaga.
“Maayo hinuon kun mao kana,†ni Melchor nga nagsagol ang kahinam ug kahibulong.
“Apan dunay bugti’ sumpay ni Melody.
“Ha?†ni Melchor. Ug nisiyagit si Agnes nga nagsud-ong sa puya nga iyang gikugos. Nisulirap ang mga mata sa bata. Nagdagan nga nanaug si Melchor sa ilang balay aron pagkuha sa albularyo. (Kataposan)