Sukad giatake sa kasingkasing ang kapikas ni SPO1 Mando Roble, wa na niya tugti nga mangunay sa buluhaton sa ilang panimalay. Di na siya gustong mahago iyang kapikas nga si Marita kay basig atakehon pag-usab. Duna na siya’y gimintin nga tambal. Apan tungod lagi sa kakugihan, siya gyu’y gustong mangunay sa panglimpiyo sa balay, pangusina ug panglaba.
Karon di na mosugot si Mando. Nangita siya og maid. Unya may girekomendar nga maid, sa maid sa ilang silingan. Si Lilang ang nisumiter og Bio-data aron makita sa papel ang iyang kasinatian sa pagpanarbaho. Sugod pa sa 1980 nagpa-maid na si Lilang. Biyuda na siya ug hapit na mosayisinta ang pangidaron.
Nasayran ni Mando nga usa ka abogado ang usa sa kanhi mga amo ni Lilang. Nangayo og written record si Mando gikan ni Atty. Arthur Namocot. Human nakadawat si Mando og record mahitungod sa panarbaho ni Lilang, iyang gipatawag ang aplikante pagka-maid. Gi-interview niya.
Wa unta ganahi si Mando sa iyang nabasa. Apan lisod na man gyud kaayo pagpangita og maid karong mga panahona.
“Ipabasa ko nimo ning sulat gikan ni Atty. Namocot. Siya ang nisulat ining kaagi nimo isip maid, gikan pa sa iyang mama, dayon niya ug hangtud sa iyang bayaw ug ugangan†ni Mando.
Gitunol ang papel ngadto sa aplikante nga naglingkod sa bangko atbang sa sopa nga gilingkuran ni Mando sa sala sa iyang balay. Daw nangluspad ug gikulbaan si Lilang nga nibasa sa papel ning buntaga.
“Nasayod na diay kas akong bad record, sir. Di na lang ko mopadayon og apply†ni Lilang nga nikanga.
“Giinterbiyo pa man tika. Wa pa man tika balibari nga di tika dawaton. Duna lang ko’y daghang pangutana nimo una ko mohukom kun dawaton o balibaran ba ka,†ni Mando.
“Una sa tanan, mangutana ko. Tinood ba ning nasulat?†ni Mando.
“Tinood na tanan, sir†ni Lilang. Niduko.
“Sunod pangutana, kun dawaton tika isip katabang namo, sublion ba nimo ning mga sayop nimo?†ni Mando.
“Dili na gyud, sir. Magtinarong na gyud ko†ni Lilang.
“Mao ra nay akong gustong masayran. Kay wa may tawong di masayop. Gusto lang ko kun nabiktima nimo ubang tawo, dili lang ko nimo apilon ug ang akong pamilya. Mohatag ko’g higayon sa tawo nga magbag-o†ni Mando.
“Magtinarong na gyud ko, sir†ni Lilang.
“Mao nay akong gustong madungog. Puwede ugma dayon, magsugod na ka’g trabaho. Apan hibaw-i nga pulis ko. Ang abogado kun mangaso, dugay pang kapadakop. Apan ako nga pulis, dihadiha human sa sayop, puwede arestahon tika dayon. Nakasabot ka?†ni Mando.
“Nakasabot, sir†ni Lilang.
“O sigi. Lakaw na. Ugma maghuwat ko nimo sayong buntag†ni Mando.
“Salamat kaayo sir, sa paghatag nimo nako’g higayon†ni Lilang. Nitindog. Nilakang paggawas sa balay.
Gisundan ni Mando og tan-aw ang bag-o lang niyang gidawat nga maid. Gipasiklapan niya’g balik ang papel sa lamesa gikan sa abogado. Nakapanglingo siya. Gibasa niya’g usab: 1990, gitaktak sa unang amo tungod sa katabian. Gidawat sa abogado nga anak sa niaging amo. 2000, nibiya sa amo kay nakigtaban og mas batan-ong lalaki. 2002, nitrabaho sa bayaw sa abogado 2004, gipatrabaho sa tiguwang amahan sa bayaw.
Ang tiguwang limot, na, gipahatag og unom ka buwan advance suweldo ang tiguwang. Wa kapahibawo sa anak nga nakasuweldo na. Ang anak gidawatan sab sa maid og suweldo. Nadoble iyang sweldo. Kay amahan ug anak naghatag. 2006 gipabantay og tindahan, nangahurot ang tinda, nangawala ang kuwarta nga halin. Gitagoan sa maid sa mga liki sa bongbong. Kun mobisita ang mga anak ulitawo sa tindahan, libre’g kaon ug inom. Way kalibutan ang amo. 2008, gitaktak na lang siya dihang daghan na kaayong anomaliya niya ang nadiskubrehan. (Kataposan)