Gula 8
Dihadiha abtik nga gisuhid sa duha ka hold-aper ang sulod sa sakyanan aron pagsuta kun kinsa ang nagpusil sa ilang kauban. Ug ila gayod kining nakit-an. Usa ka lalaki nga nagkalo og brown ug nagdiyaket og maong. Armado kini og .45 kalibreng pistola.
Misiga ang mga mata sa duha ka tulisan samtang nagtan-aw sa lalaking mapangahason nga mipusil sa ilang kauban. Dihadiha, halos nagdungan sila pagbakyaw sa ilang mga kamot nga naggunit og armas aron pagluthang sa maong lalaki.
Apan abtik ang lalaki nga nagkalo og brown ug nagdiyaket og maong. Una siyang nakakablit sa gatilyo sa iyang .45 kalibre ug mibutalid dihadiha ang hold-aper nga buot molugos ni sister Veronica. Hingigo kini. Sharpshooter. Ang hold-aper nga naigo sa iyang pagpusil naluko sa salog sa bus duol sa lingkoranan nga nahimutangan ni sister Veronica.
Ang ikatulong hold-aper ingon sa naglungotlungot nga nagtan-aw sa lalaki nga nakapatay sa duha niya ka kauban. Gipusil niya kini sa gikuptan nga pistola. Apan ang lalaki nga nagkalo og brown ug nagdiyaket og maong abtik nga nakatago sa luyo sa mga lingkoranan sa bus.
Niining higayona, ang mga pasahero nanaghapa sa salog nga gihakop sa tumang kalisang. Ang uban mitago sa mga lingkoranan sa bus. Si sister Veronica wala makalihok sa iyang nahimutangan.
Ang hold-aper midasdas ngadto sa gitagoan sa lalaki nga mipatay ngadto sa iyang mga kauban. Wala siya molunga pagpabuto sa iyang armas. -- Sumpayan pa