Linog sa Oktubre ug alimpus sa Nobiyembre

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Wala pa mahuwasi sa kakulba nga ilang gibati sa mga molupyo sa Sugbo ug Bohol sa nahitabong linog niadtong  Oktubre 15 niining tuiga nga nagbilin gayod og dakong kadaut sa mga kabtangan sa simbahan, pribado ug gipanag-iya sa kagamhanan ug mikalas pa og kinabuhi sa daghang katawhan sa nahisgotang duha ka lalawigan sa Kabisay-an.

Gisundan pa kini sa daghang pagtay-og nga gitawag og aftershock nga maoy hinungdan nga ang Department of Education (DepEd) Region 7  nakahukom na lamang sa paglugway sa mga adlaw nga wala’y klase tungod sa nagpadayon nga aftershock ug nagpadayon nga pakisusi sa mga structural engineers sa gibiling kadaut sa mga lawak saringan.

Naghinayhinay na og kawagtang ang mga pagtay-og sa aftershock nga mugna sa kusog nga linog nga nanukad sa lalawigan sa Bohol apan kalit lang nga naalarma ang pipila ka molupyo sa lungsod sa Compostela sa gabii niadtong Nobyimbre 4  niining tuiga.

Dihang taliwala sa kusog nga pagbunok sa ulan nga gidunganan sa panugdog ug kilat kalit man mihaguros ang kusog kaayong hangin nga mikusokuso sa sitio Guiwanon sa barangay Poblacion sa maong lungsod nga nakapakurat kaayo kanila sanglit daw man lang nga giukab ang  atop sa ilang panimalay  ug giibot pa ang karaan na kaayong  duha ka dagkong punoan sa            mangga.

Gikan sa lungsod sa Compostela ang alimpus o kusog nga  hangin nga nagtuyok mitadlas sa kadagatan ug didto motugpa sa barangay Tingo sa isla sa Olango ug mikanlat pa sa  walo ka mga panimalay ug barangay hall.

Gikan sa barangay Tingo sa isla sa Olango  ang maong hangin nga nagtuyok usab muhapit sa barangay Mactan sa mainland sa dakbayan sa Lapulapu ug mikanlat og atop sa tulo ka mga balay ug miangol sa lima ka tawo.

Wala pa gayod matagbaw ang maong hangin nga nagtuyok nga mikusokuso sa  malabyan niining dapit miigo pa gayod kini sa sitio Bohol-Bohol sa barangay Looc sa dalan Juan M. Ceniza  ug walo ka balay usab ang gipangkanlatan sa ilang mga atop.

Hinuon pasalamat lamang ang mga molupyo sa maong dapit nga ngadto sa Labaw nga Makagagahom tungod kay bisan kun naigo pa sila sa hangin nga nagtuyok nga nagbilin usab og mga kadaut apan wala man  kini  mokutlo og kinabuhi.