Bisperas pa lang gani sa pista sa among lungsod, miuli nako gikan sa dakbayan sa Sugbo, diin ako temporaryong nagpuyo. Nag-abang man lang gud ko og usa ka kuwarto, haduol sa kompaniyang akong gitrabahoan. Kay hasolan man ko nga magsige’g uli sa amo. Ug kapoyan usab ko nga magsige og biyahe sakay sa trak depasaheroan.
Wala gayud ako mahimutang diha sa among balay sa dihang naabot nako sa amo. Gipahimuslan ko gayud ang higayon sa pagpanghangpang sa akong mga suod nga mga higala ug kaparyentehan. Gusto man gud kong makighimamat kanila, bisan sa daklit na lang.
Ang katapusang balay nga akong giadto, mao ang balay sa akong kumpare, nga si Pare Jaymart. Ug didto gyud ko malangay pag-ayo, ilabi na kay gikaabot ko man didto ang akong mga barkada kanhi. Sa nanagtungha pa kami sa hayiskol, ug hangtud na gani na-college na mi.
Gawas nga may kaon sa balay sa akong kumpare, naghasi pa gayud ang inom. Mga mahalong bino pa ra ba ang gipangdalit. Kasumaran man sab gud diay sa adlaw nga natawhan sa akong kumpare kadtong higayona. Maong naghikay sila, bisan wala pay pista.
Sa uban gud nga mga balay nga akong giadtoan, kadiyot ra man ko kaayo. Igo man lang gani kong nangumusta kanila ug nakighinangpanay. Ilabi na sa mga suod ko gyud kaayo, kun mga paryente. Nga taudtaod na usab nakong wala ikahimamat. Sagad nakong gihimo mao lamang ang pakiglamanuhay ug pakigginaksanay kanila. Lahi kaayo sa gihimo namo diha sa balay sa akong kumpare.
Samtang nagsige mi og inom, dalang sumsoman, nahisgutan namo ang kalihukan nianang gabhiona, didto sa plasa. Akong nahibaw-an nga nianang gabhiona, ipahigayon diay ang koronasyon sa napiling rayna sa among lungsod ning tuiga. Gikatakda man god nga ang koronasyon pagahimuon gayud sa bisperas sa kapistahan.
“Maayo kay ania ka, Rudy. Hangyuon ka unta namo, nga ikaw maoy mohalad og balak, ngadto sa atong rayna,†nagkanayon si Erwin. Ang napiling pangulo sa committee on program. Alang sa kasaulogan sa ilang pista.
“Ako gyud?†dali ra kaayo kong nakatubag. Nga nakalitan usab sa gihangyo kanako ni Erwin.
“Oy, ayaw ko’g ingna nga mobalibad ka. Wala ka lang mahibawo kun kinsay napiling rayna? Usa baya ni sa nabuangan kaayo nimo kaniadto,†mikalit og timang si Kevin. Usa sa mga suod ko kaayong higala.
“Kinsa man diay maoy napiling rayna?†Nakapangutana na lang gyud hinuon ko. Mora man gud og may tanghaga ang sinultihan ni Kevin.
“Si Katrina. Ang imo gong kanhi,†si Erwin maoy mitubag sa akong pangutana.
Napahaugnok hinuon ko og kadiyot, pagka dungog ko gayud sa ngalan ni Katrina. Wala man gud ko magdahom nga nahiuli na diay si Katrina. Ug gani, mao pay napiling rayna alang sa kapistahan sa among lungsod. Milangyaw man gud kini sa laing nasud. Ug didto manimpalad alang sa iyang kauswagan.
Unya, kalit lang kong nakahanduraw sa mga nanglabay’ng gutlo sa akong kinabuhi. Lakip na kadtong mga kaagi nga nagtagik og mga maanindot nga sugilanon tali kanako ug kang Katrina. Ang babaye nga maoy unang nakapapitik sa akong kasingkasing. Ug natingban sa tim-os kong pagmahal.
Nagkahigugmaay man gud kami si Katrina kaniadto. Gani, wala’y sama katam-is ang among pagminahalay sa usa’g-usa. Kay ang matag usa kanamo, pulos man naghambin sa tim-os ug tiunay nga pagmahal. Nianang pagmahal nga hinukad gayud gikan sa kinauyokang bahin sa among mga kasingkasing.
Sa sinugdan, buhong kaayo kami sa kalipay. Mora gani kami’g nagpuyo sa usa ka paraiso. Nga malipayon kaayong nagsawo pagdimdim sa dugos sa katam-is sa duha namo ka gugma. Hapit sa tanang mga gutlo, mora’g kalipay ra gayud maoy among natagamtaman. Ug mora gani usahay og anaa na kami sa langit niadtong mga higayona.
“Unsa na. Mouyon ka sa akong gihangyo kanimo? Nga ikaw maoy mohalad og balak ngadto sa napiling rayna sa atong lungsod?†Gisuna na usab ako ni Erwin. Nga maoy nakaputol sa akong paghanduraw.
Wala’y tingog nga migawas gikan sa akong mga ngabil, agi’g tuba’g kang Erwin, apan dihay matam-is kaayong pahiyom, nga akong gibuhian nga giubanan ko’g pagyango. Timaan sa akong pag-uyon sa iyang gihangyo ngari kanako.
Nakahunahuna man gud ko nga dili maayong palabyon ang maong higayon kay talagsaon ra kaayo kini. Ug mao ra usab kini ang higayon nga ikapabati ko gayud ngadto kang Katrina ang gisinggit sa akong kasingkasing.
Dugay naman gud kaayo, nga wala kami magkakita ug magkaestorya. Sukad lang kami magkabuwag human siya molangyaw ngadto sa laing nasud. Tungod lagi sa awhag sa iyang mga ginikanan. Nga wala gyu’y gusto kanako. Nga maoy mahimo niyang kapikas sa kinabuhi. (Katapusan)