Ang mga hunahuna nga gipadayag dinhi iya ra sa tagsulat ug wala’y labot ang Banat News ug mga sakop niini.
Nagkinahanlan og dugang tabang ang mga molupyo sa lungsod sa Cordova nga naapektohan ang ilang panginabuhi sa pagkalunod sa MV Saint Thomas Aquinas 1 sa 2GO shipping sa nahitabong pagbangga sa cargo vessel nga MV Sulpicio Express Siete niadtong Agosto 16 sa gabii niining tuiga. Ang mga molupyo sa mga barangay nga nahimutang sa daplin sa kadagatan maoy nag-una nga naapektohan sanglit nahunong man ang ilang panginabuhi nga nagsalig lamang sa pagpanagat ug pagpanginhas og kinhason sa halapad nilang hunasan nga gitina sa asite ug krudo nga nayabo gikan sa maong barko nga nalunod sa dakbayan sa Talisay.
Ang nagkadaiyang ahensiya sa atong kagamhanan nga naglakip sa buhatan sa Department of Social Welfare and Development, (DSWD) 7, Department of Environment and Natural Resouces (DENR) 7 ug ang buhatan sa Bureau of Fisheries and Aquatic Resources (BFAR) 7 naghimo na og mga lakang sa pagtabang kanila. Gitabangan na usab sila sa lokal nga kagamhanan sa maong lungsod ug ingon man sa kagamhanan sa lalawigan sa Sugbo human usab sa pagpalabang sa resolusyon nga gipangamahanan ni 6th District Board Member Thadeo Ouano nagdeklarar nga state of calamity sa lalawigan sa Sugbo.
Apan ang maong hinabang nga nadawat sa maong mga molupyo dili pa gayod paigo sanglit nagkinahanglan man sila og ikatapak sa nahunong nilang panginabuhi alang sa matag adlaw nilang panginahanglan nga maoy naepektohan sa gitina nga oil spill sa ilang kadagatan.
“The assistance we’ve received from government agencies are not enough,†nagkanayon sa iyang pamahayag si Teodulo Jumao-as kinsa maoy chairman sa Municipal Fisheries and Aquatic Resources Management Council sa maong lungsod.