Taud-taud na ang panagtipon nila ni Alex ug Sannie ug maayo ang ilang panag-uban. Gilikayan nila ang panagkasumpaki sa maayong kabubut-on. Alang ni Alex kanunay niya nga gisabot si Sannie sa panahon nga kini abuton og sapot.
Ingon usab niini ang gihimo ni Sannie kang Alex. Dunay mga higayon nga paraygan ni Sannie ang iyang bana kun makabantay siya nga kini maghinuktok, ilabi na kun gamay ra kini og kita sa iyang pagpangmasahe. Usahay ang kakapoy sa lawas ni Alex nga gikang nangmasahe inanay lang nga mahumpay kun paraygan na siya ni Sannie. Ang ilang mga parayeg maoy magtukmod kanila sa pagtagay sa lawasnong kalipay.
Hangtod nga miabot na ang adlaw nga manganak na si Sannie sa una nila nga anak ni Alex. Mora’g “automatic†nga si Alex nahimong amahan sa tulo ka mga bata, apil na ang duha ka anak ni Sannie ug sa iyang bana nga patay na.
Tungod sa maayo nga pagkadala ni Sannie sa iyang tindahan, dali ra nga miasenso ang iyang negosyo. Sa laktud wala na gayud sila magkalisud-lisud sa pagpuyo.
Usa ka hapon, may mitawag sa selpon ni Alex. Babaye ang nanawag ug dakuon ang iyang tingog. Gusto kini nga magpamasahe ug adto sila magkita sa gasoline station sa V. Rama Avenue.
“Dunay nagrekomendar nimo nga akong amiga, maayo kuno ka momasahe. Maghuwat ko nimo sa gasoline station sa V. Rama,†matud sa babaye sa pikas linya.
Miadto si Alex. Tuod samtang nagbarug daplin sa karsada may miduol kaniya ug miagda nga manakay sila’g taksi. “Adto lang ko masahi-i sa akong kwarto Alex.â€
Gikulbaan si Alex kay paminaw niya dakung babaye ang iyang customer kay daku’g tingog. Misakay sila’g taksi, wala’y gisulti ang babaye sa drayber apan misirit lang pagpadagan.
Taud-taud, mihunong ang taksi. “Imo na ang sukli,†sa babaye pa. Gigunitan sa babaye ang sungkod ni Alex ug gigiyahan ang buta nga mosulod sa kwarto.
Nakabantay si Alex nga air-con ang kwarto, mora’g motel. “Masahi-i ko Alex ug human nimo’g masahe, imo na ang akong lawas,†matud sa babaye nga daku’g tingog.
“Ma’am sori kaayo ha, dili ko makahimo. Minyo na ko ug dili nako budhian ang gwapa nakong asawa,†pwerte nga nakapamalibad ni Alex sa iyang customer.
Nakabantay si Alex nga naghukas sa iyang sapot ang babaye. Gibag-iran siya sa wala nay sapot nga babaye. “Dili ko Ma’am, pasayloa ko,†ni Alex pa.
Milanog ang katawa gikan sa babaye. Nakamay-ong si Alex nga katawa kini ni Sannie. “Saludo ko nimo Alex nga di ka g’yud diay magbudhi nako. Sumad karon sa adlaw nga una kita nga nagkita,†matud ni Sannie.
Nagkataw-anay ang duha ug dayon nagparayganay. – (Kataposan)