Human makapanglimpiya-butas si Jojo sa tanan niyang mga suki sa usa ka barangay dinhi sa siyudad, midiritso siya sa tindahan og ukay-ukay nga panapton sa dalan Colon.
Tungod kay mikabat sa 400 persos ang iyang kinitaan ning Sabadoha, nakahunahuna si Jojo nga palitan og ukay-ukay nga purol ang kargador niyang amahan nga si Noy Baldo, ning hapona. Segurado gayud nga malipay ang iyang amahan kun mapalitan niya kini og ukay-ukay nga purol.
Limpiya-butas ang nahimong panguwartahan ni Jojo gikan sa nag-edad pa siya’g 6 ug hangtod nga mitungtong na siya karon sa 12 anyos ug mogradwar na sa Grade six sa publikong elementaryang eskuylahan sa siyudad. Ang iyang pagpanlimpiya-butas nakatabang kaayo sa iyang inadlaw’ng alawans sa pag-eskuyla ug nakaabag usab sa iyang papa Baldo nga usa lang ka kargador diha sa merkado publiko sa Carbon ning siyudad.
Tungod kay wa nay puwesto si Jojo sa pagpanglimpiya-butas sa dalan Colon, nakahukom siya sa pagsiot og suroy sa kabarangayan sa siyudad. Hangtod, nakabaton siya og daghang suki nga iya lang dumdomon matag Sabado ug Domingo. Nagdako si Jojo nga way inahan, kay nasayran niya nga gibiyaan sa iyang inahan ang kargador niyang amahan, lima ka bulan human siya ipanganak ug nakigtaban og laing lalake.
“Hmmm! Malipay gyud si papa Baldo ning ukay-ukay nga maong purol, nga akong gipalit niya. Singkuwenta pesos ra, apan mora sab og brand new...!†nakapahiyom si Jojo. Mihapit na lang sab siya sa pagpalit og pansit ug puso, alang sa ilang panihapon sa iyang amahan.
Hilabihang lipaya ni Noy Baldo, dihang gihatag na ni Jojo ang pinalit niining ukay-ukay nga maong purol, human sa ilang panihapon sa dalang pansit ug puso.
“Pagkabuotan gayud nimo, Dong Jo! Nindot ug bag-o pa kaayo kining purol nga maong...!â€
“Maayo na lang na, Pa, nga duna kay kailis-ilisan nga laing purol! Tinapakan na ra ba ang uban mong purol...!â€
“Uy, Dong Jo, duna may papel ang bulsa ning ukay-ukay nga purol!,†ni Noy Baldo nga misulingsuling ug mitutok sa pinilong papel. “Hala, 1,000 US dollar man ni Dong Jo...!â€
Nahasiga usab ang mga mata ni Jojo nga dugay’ng mihiling sa papel nga dolyar sulod sa bulsa sa ukay-ukay nga purol.
“Tinuod ug orihinal gyud nga 1,000 US dollar, pa Baldo...!†ug parehas nga nakalukso sa tumang kalipay ang amahan ug anak sa wa damhang grasya nga ilang nadawat niadtong hapona, gikan sa ukay-ukay nga purol. (Kataposan)