Natuman na ang pagbuot ni Mayor Michael “Mike” Rama.

 Napulihan na si Cebu City Police Office (CPPO) Director Sr. Supt. Mariano Natuel Jr. ni Sr. Supt. Noli Romana, ang paboritong opisyal sa military sa kasingkasing ni Rama.

Sulod lamang sa pipila ka bulan, diin si Natuel maoy midala sa renda sa CPPO, gimatuod sa director ang kahusay, ug kalig-on sa iyang pagpangalagad. Kadto lang pagpatunhay sa kalinaw sa miaging Sinulog. Semana Santa ug eleksiyon dinhi sa atong dakbayan taliwala sa mapangahasong dagkong balod nga nagpunay’g hasmag sa Kapitolyo, igo na kaayong sukaran nga taorag medalya sa pagdayeg ang walang dughan ni Natuel.

Ang walay hunong paggukod sa mga dautang elemento sama sa drug lords, gambling lords, swindlers, carnappers, tulisan ug uban pa, diin ubay-ubay nang dagkong kaso ang nasulbad gumikan sa kasinsero sa iyang panerbisyo, haom kaayong himuong lig-ong pundasiyon, diin ipabarog ang bantayog sa kakugi, kaisog ug kabantog agi’g pagyukbo sa iyang kaligdong.

Apan ingon sa wala lang kini makita ni Mayor Mike. Luyo sa matahom nga imahen nga gikulit ni Natuel sa kasingkasing sa dakbayan sa Sugbo, wala gihapon mobelib ang mayor sa gipakitang kaabtik sa director diha sa iyang pagpanilhig sa nagkadaiyang sagbot nga nagpasad lang sa bisan asang dapit ning atong katilingban.

Ambot, nganong ingon sa dili man gyud madawat-matulon sa ginhawaan ni Mike ang mga dalayegon ug sulondong buhat ni Natuel? Ambot ngano, nga bisan pa sa pagyagyag ni Regional Director Garbo bahin sa mga hiwing binuhatan ni Supt. Romana, hugtanon man gihapong gipili ni Mayor Mike ang maong opisyal, kinsa sumala pa sa paghulagway ni Garbo, usa kuno ka illegal gambling protector?

Unsa man diay ang mas importante alang ni Mayor Mike Rama: Ang agi ni Supt. Natuel, o ang katungod sa iyang pagpili kinsay iyang himuong Director sa CPPO? Wala kahay nagpahiping tinagoan likod niini? Hinaut pa unta nga wala!