Ang kahoy nga matumba ug ang modahili nga yuta

Gipahimangnoan ang mga molupyo nga nahimutang sa daplin sa pangpang nga magbantay sa pagdahili sa yuta sa panahon nga kusog ang pagbunok sa ulan kay kuyaw nga matabonan sa modahili nga yuta.

Gipahimangnoan usab ang mga nagpuyo sa daplin sa kasapaan tungod kay kun kusog ang ulan  nga makamugna og pagbaha kuyaw usab  ang gipuy-an nga magbaha ug mabanlas na hinuon ang panimalay sa kadagatan.

Dugang pa diay niini nga nagkinahanglan usab nga bantayan sa panahon nga kusog ang pagbunok sa ulan  mao ang mga panimalay nga nahimutang sa tugkaran ang  dakong punoan sa kahoy, lubi ug ingon man ang dakong punoan sa buli nga natumba nga mikalas og kinabuhi.

Sa habagatang bahin nga kadalanan sa dakbayan sa Sugbo  sa miaging mga bulan niining tuiga maoy nahitabo ang pagkatumba sa dakong punoan sa acasia nga wala man hinuon mokalas og kinabuhi apan nakabalda sa dagan sa mga sakyanan kay naalihan man ang karsada.

Sa dakbayan sa Mandaue  sa miaging katuigan  nahitabo na usab ang pagkatumba sa dakong punoan sa buli ngadto sa panimalay ug ang nagpuyo nga nahinanok og katulog nga natumbahan nakalas gayod ang kinabuhi.

Sa mga gimbuhaton nga naglambigit ang kalikopan maoy  gitahasan nga ahensiya sa kagamhanan sa pagbantay ug paglatid og mga lagda ang buhatan sa  Department of Environment and Natural Resources (DENR) sa pagsiguro nga dili kaabusohan ang kalikopan nga naglakip sa kadagatan, kasapaan, kabukiran  ug kakahoyan.