Gula 123
Nagpuyo gayod kami si Walter sa Nazareth, Buhisan, Cebu. Wala mi maglisod og pangita’g abangan, nakakita dayon mi og balay, si Noy Segundo ang tag-iya sa balay. Nagsugod ko og bag-ong kinabuhi uban kang Walter. Malipayon kami sa among panagtipon. Wala na kami angay kabalak-an kay dili na man makapanghilabot si Daniel kanamo. Buhong kami sa kalipay nga lawasnon kay agresibo man kaayo si Walter. Nagplano si Walter nga iyang ipa-annul ang ilang kasal kun duna na siya’y kuwarta aron mahimong legal ang among pagpuyo.
Nalipay mi si Walter dihang usa ka adlaw niana, nakadawat si Walter og tawag gikan sa agency nga iyang giaplayan sa Manila. Nag-follow up kun dili pa ba siya gustong mobalik sa gawas kay dunay trabaho nga naghulat kaniya. Ug wala na niya palabya ang maong oportunidad. Gisaaran niya nga molarga dayon siya sa labing daling panahon.
“Pag-ayoayo dinhi, ha kay magpakasal lagi ta kun makatigom na ko,†ni Walter pa.
Ug milarga dayon si Walter paingon sa Manila nianang pagkasunod adlaw.
Sa akong hunahuna mora ko’g gikuhaan sa tanan. Gibati ko ang tumang kamingaw sa dihang nagkalagyo na kami si Walter. Lahi gyud ang akong gibati alang kang Walter. Kaniadto sa nagtipon pa kami si Daniel, dili man ko mingawon niya sa higayon nga magkalagyo kami. Apan kang Walter, daw dili nako maantos ang kamingaw bisan kanunay kaming magkontakay sa cellphone. -- Sumpayan pa