Hayahay ang Polis - Gula 4

Aron nga susama gayud siya tan-awon sa tinuoray nga drug addict, gituyo paglugod-lugod ni Larry ang iyang mata pinaagi sa iyang mga tudlo aron magpuwa sama sa mata sa mga adis-adis.

Tuod, wala gayo’y nagduda kang Larry kinsa nagsul-ob lang og hilis na nga sinelas ug pughaw na nga sleeveless T-shirt ug lawlaw nga karsones-maong.

Nakabantay si Larry nga hapit na motikyup ang kilum-kilum. Mianam-anam na kadaghan ang mga tawo nga nangabot didto sa bahin sa barangay nga nahimutangan ni Larry.

Ang mga batan-on nga mosulod sa balay nga giingong drug den nga subject sa operation sa mga polis karong taud-taud, magpanglingi usa ug nasabtan ni Larry nga gusto lang mosiguro nga walay mga polis nga makakita kanila.

Wala sila makabantay nga ang tawo nga mora’g adis-adis nga nagpungko daplin sa aseras ug mata’g karon ug unya maghukdong usa diay ka polis.

Dunay mga batan-ong babaye nga nangabot. Nasabtan ni Larry nga mga tiggamitan usab sila og illegal nga drugas basi sa sinul-oban sa ilang mga sapot.

Wala gayud masayop si Larry kay pipila sa maong mga babaye misulod sa drug den. Ang tanang nakita ni Larry hilum niya kini nga gi-text sa ilang hepe.

“Standby m dha ky mo-rush up na ang tropa dha sa area few minutes frm nw,” text sa ilang opisyal nga nasabtan ni Larry nga gipadala kanilang tulo ka detectives sa area.

Basi sa gikasabotan nga inig-rush up na sa mga polis nga kauban nila ni Larry, modali siya pagsibat aron magtoo gayud ang mga tawo nga tinuod siya nga drug addict.

Ang duha ka kaubang polis ni Larry nga nagpatoo nga balut vendor ug ang lain pang usa ka polis mao ra ang magpabilin og maniid sa palibot. Taud-taud mikalit lang sa pagguho ang mga polis gikan sa lainlaing dapit ug gilibotan nila ang drug den.

Nalantawan dayon ni Larry ang ilang opisyal nga nagbitbit og handheld radio nga mi-coordinate sa mga sakop. Midali pagsibat si Larry nga nagpatoo nga nahadlok.

Basi sa gikasabotan, dunay polis nga mosuway kunohay sa paggukod ni Larry aron hingpit nga magtoo ang mga tawo nga usa kini ka tiggamitan og illegal nga drugas.

Mibalik si Larry sa police station ug nagsul-ob na sa iyang uniporme. Wala madugay nangabot ang mga polis nga mironda sa drug den ug dala nila ang siyam ka dinakpan, apil ang tag-iya sa drug den ug ang tulo ka batan-ong babaye nga drug users.

Gwapa ang usa sa tulo ka babaye nga nadakpan. (Sumpayan)