Magdalena - Gula 92

Pagsulod nako sa kuwarto, naabtan nako si Daniel nga naglingkod sa ngilit sa kama.

“Nagmata ka na diay?” Nako pa nga miduol kaniya.

“Taudtaod na,” mubo niyang tubag.

“Maniudto na ta.”

Wala siya motingog. Mitutok hinuon siya kanako. Dili ko makaharong sa iyang mga mata. Gikulbaan ko kay lain ang mensahe sa iyang tinan-awan. Mora’g duna siya’y gustong isulti kanako.

Milingiw ko kay dili ko makahimo sa pagpakigtinutokay kang Daniel. Mora’g molagbas sa akong kasingkasing ug kabukogan ang iyang tinan-awan.

“Moinom na diay ka ron, Loves?” Gipangutana ko ni Daniel.

“Nga-nganong nakapangutana ka man og ingon niana, Loves?” Gisumbalik ko siya sa pagpangutana apan wala ko motan-aw niya.

“Ayaw tubaga’g pangutana ang akong pangutana. Ang akong pangutana maoy tubaga.”

“Dili ko moinom, uy. Ngano gud tawon. Wala ko maanad niana.”

“Pero, nganong duna may botelya sa beer dinhi sa atong kuwarto?”

“H-ha?” Nahakanga ko.

“Naa, o,” gitudlo niya ang ilawom sa kama dapit tiil-tiil niini.

Wala ko makatingog. Patay! Tuaw ko sa hilom. Si Camilo ang tag-iya sa botelya nga nahibilin sa kuwarto. Nahinumdom ko nga may gitungab siya dihang nahuman ang among lovemaking session. -- Sumpayan pa