Bug-at ang sampot ni Ismael nga gibundak sa driver’s seat. Igo ang andar sa makina human niya lisoa ang yawe, sama kaisog sa nag-aso-aso niyang kalagot nga hangtud karon maoy mihari sa iyang galamhan.
Nagkabingkil man god ang duha ka dalan nilang Roger, kauban niyang instructor sa Gang Nam Dancing. Wala magkapareha ilang gusto, nagkaambihas! Pwerteng lalis nila sa hustong stepping. Nag-irgo kinsay masunod? Dihand di gyod pakorehir si Roger, nahayblad si Ismael. Mibiya siya sa gym.
Subay sa Jones Avenue paingon sa Fuente Osmeña, naghaguros ang brand new Civic Honda ni Ismael. Walay kalainan sa halas iyang sakyanan, ang-ikis-ikis nga milusotlusot sa hagip-ot nga kaagian. Ubay-ubay’ng motorista ang nakuyawan sa iyang gihimo. Gilabay siya’g mga sirbato. Apan wa siya’y nadungog. Yatakan pa unta ni Ismael ang gasolinador dihang kalit lang mihunong ang Mercedes van nga iyang gisundan. Pula na diay ang traffic lights itaas sa dalan atubangan sa Capitol Building.
Miigot ang mga ligid sa kotse nga hala, pugong taman sa ginhawa nga dili madam-ag. Nagyangoyango ang dulong sa daw naghangos nga Honda Civic nga gamay na lang kaayo’g kulang aron mosaghid sa likorang step board sa van. Misamot pagdilaab ang kasuko nga gibati ni Ismael ngadtong Roger. Nagpaminti siya sa tumang kalagot! “Animal kang Rogera ka, hapit lang nuon ko madisgrasya. Buwisitttt!†Yawyaw sa iyang kahiladman. Iyang panan-aw hait kaayong gitutok sa unahan, apan wala tuyoa nasangit kini sa estanteng likod sa van nga may nasulat: ‘Getting angry is actually sacrificing yourself with the mistake of others.’
Nahipugwat si Ismael pagkabasa sa maong panultihon. Ug ang grabeng kainit sa iyang kasuko ingon sa gisabyaga’g tubig sa kahimatngon. Busa, maoy mipuli ang kabugnaw sa iyang panghunahuna. Pagsiga sa ‘Go signal’, hinay na ang iyang pinadaganan sa kotse. Linaw na kaayo sa iyang mga mata ang karsada nga iyang gisubay. (Kataposan)