Tubig-tubig

Ubos sa kahayag sa takdol nga bulan, nagkapundok na usab ang kabataan sa baryo, sa halapad nga wanang sa patag nga bakante nga maoy gihimo nilang dulaanan og tubig-tubig. Ang baga ug pinong kasagbutan sa bakanteng luna, gibadlisan sa kabataan pinaagi sa pagtambak niini og itom nga mayukmok sa yuta.

Giporma nila og unom ka dagkong kahon nga espasyo nga gibadlisan usab sa tungang bahin, aron maoy dagandaganan sa kabataan nga magbantay sa ilang mga kadula nga dili makasulod ug makalabang sa badlis sa unom ka mga espasyo aron sa pag-inom kunohay og tubig.

Sila si Duardo, Isyot, Redo, Henry, Nilo ug Sidro maoy naglangkob sa mga batang lalake. Samtang sila si Sita, Glenda, Laida, Angie, Sol ug Nida maoy babayeng kabataan nga andam na sab sa dulang tubig-tubig.

“Unom-unom ta nga magdula...!” misinggit si Duardo. “Tulo ka mga lalake ug tulo ka mga babaye sa matag grupo. Kauban ko sila si Isyot, Redo, Sita, Glenda ug Laida...!” “Sige, sugdan na nato ang dulang tubig-tubig...!” kusog nga misinggit sab si Henry. “Kauban ko sila si Nilo, Sidro, Angie, Sol ug Nida! Ako ang magbantay sa burohan...!”

“Mag tubig-tubig na ta...!” nagdungan og singgit ang kabataan nga managsilingan ug managklasmeyt sa Grade Five sa elementaryang publikong eskuylahan sa ilang baryo.

“Ang unang grupo nga maka-iskor og inom sulod sa lima ka higayon nga makalusot sa badlis ug dili gayud madakpan sa nagbantay, maoy ilhong mananaog...!”

“Yahooo...! Magdula na tag tubig-tubig...!”

Hilabihang sadyaa sa grupo sa kabataan dihang gisugdan na nila ang ilang dulang tubig-tubig sa halapad nga luna sa patag nga bakante niadtong gabhiona. Ang kahayag sa takdol nga bulan maoy nagbanwag sa malipayong kabataan nga padayong nagdula og tubig-tubig.

“Mopauli na ta’s atong tagsatagsa ka panimalay kay magtuon pa ta’s atong leksiyon sa eskuylahan...!”

“Bitaw! Kay gitawag na sab ta’s atong mga ginikanan...!”

“Sa sunod na sab tang gabii magdula og tubig-tubig...!”

Unya, malipayong namauli sa ilang panimalay ang kabataan human sa masadya nilang panagdula og tubig-tubig niadtong gabhiona nga takdol ang bulan. (Kataposan)