CITOM di mosugot motor cross helmet maoy gamiton

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Hugot nang gipatuman sa CITOM ang helmet ordinance. May kaugalingon silang standard sa matang sa helmet nga maoy ilang ipagamit sa tanang motorista. Ang mosupak niini, dakpon!

Usa ka Joy L. Jocson, kinsa miyembro sa Power Sports Racing nga anaa mahimutang sa Minglanilla, Cebu, naglibog kun nganong ang ilang helmet nga maoy gamiton sa drag racing o motor cross, dili man itugot sa CITOM?

Branded ang mga motor cross helmets nga gipangsul-ob sa ilang grupo. Hinimo sa nabantog nga One Industries nga nagdala sa ngalang: Bell, Thor, Shoei ug Suomy. Matud ni Jocson nga may mga protecting rubber shields ang ilawom sa maong helmet ug komportabling isal-ob sa ulo. Simbako’g madisgrasya, mapantok ang ulo sa gahing bato, maoy unang mabuak ang helmet ug dili ang ulo. Sanglit gidesayin man kini alang sa pagdepensa sa ulo.

Di pareha sa mga helmet nga maoy gustong ipausar sa CITOM, diin sagad niini, made ni China. Gahi man tuod ang outer surface, diin bisa’g ibundak pa sa semento, di gyud mabuak. Apan delikado’g ang ulo sa tawo maoy moliki ingkaso’g madisgrasya kay ginama man usab sa gahing materyal ang ilawom sa maong helmet.

Matud ni Jocson, nga ang helmet nga ilang gigamit pulos nakapasar (gani milapas pa) sa United States Department of Transportation Federal Motor Vehicle Safety Standard No. 218 ug usab pasado kini sa Snell Memorial Foundation M2010 Standard. Mahal ang ilang helmet. Tag 25T ngadto sa 30T. Timaan, nga tibay ug dekalidad ang mga materyales nga gidapat sa paghimo. Naka-meet pud kini sa safety standard sa Department of Transportation una sila gitugtan sa paggamit niini.

Unya nganong dili man kini aprobado sa CITOM? Nganong ang made in China man gyud ang ilang ipamugos nga mas safety man ning helmet nga gigamit nilang Jocson kay sa girekomendar sa CITOM? May nagpahipi bang dautang anino? Makamugna baya ni’g mga panganod sa pagduda, Tsip?

Ngano man diay’g atong susihon kun tinuoray ba ang gisulti ni Jocson? Ug kun masayran nato nga lig-on ug pangproteksiyon gyud diay kini sa ulo, dan; atong papitlan og white ICC sticker. Payits ba?