Dili magpahulam sa cellphone

Dear Tito Miguel,

Maayong adlaw , ako diay si Harley, taga Mandaue City. Akong problema ron kay ang akong girlfriend nga arte kaayo sa iyang cellphone . Usahay dili man gyud malikayan nga manghulam ko sa iyang cellphone ilabi na usahay wala ko'y load . Apan bisan unsaon nako og hangyo ,dili gyud siya mosugot . Actually morespetar man gyud  ko og privacy, apan tungod sa kaarte niya sa iyang phone,makaduda na hinoun. Basin duna siya'y laing tawo nga gikalingawan. Unsay angayan nakong buhaton aron masuta nako ang kamatouran ? — Harley

* *  *

Harley,

Lagmit duna siya’y gitago, posible dunay lain. Ang uban man gani nga manag-uyab kahibalo sa password sa ilang tagsa tagsa ka cell phone ug social media account. Apan siya, di gyud ipahuwam nimo maski importante. Hadlok siya dunay mosulod nga mensahe samtang nigamit ka niini, o dili ba kaha duna kay maukayan.

Sakto ka sa pagrespeto sa iyang privacy, apan dunay kalahian ang pribado sa sekreto. Ang sekreto duna’y gipahipi nga milagro. Dako ang purohan nga dunay gitagoan imong uyab, kun imo mahibaw-an, basin inyo awayan o sa pagbuwag maoy hinungdan.

Kun gusto ka makahibalo sa kamatuoran, ayaw’g pangutana. Inay nga mangimbestigar, tagamtama ang unsay naa ninyo karon. Ang duda makabalda. Kun sayop imong duda, anugon ang panahon nga nag-away mong duha sa rason nga walay basehan.

Total, ang kamatuoran motumaw ra’g iyaha sa panahon nga wala  nimo damha. Ka’y kun mosukit sukit ka niya, siya makamatngon, samot motago. Ayaw ipakita kaniya nga ikaw nagduda, aron mokumpyansa. Kun siya kampante na, diha na mabuslot iyang tinagoan, diha na molusot ang kamatuoran.

Kun dili nimo mahibaw-an iyang tinagoan sa cell phone, mahibaw-an ra gihapon ni nimo sa ubang tawo o sitwasyon. Kun duna gyud siya’y lain, moabot gihapon ang panahon duna’y makakita nila, inyong mga higala o pamilya nimo. Timan-i, tanang nagbinuang, sa kataposan masakpan. Kanus-a, mao na  ang pangutana. Kabantay ka duna kay butang nga pangitaon apan di gyud makit-an? Pero kalit lang mopakita ra’g iyaha kun wala  nimo pangitaa. —Tito Miguel

Magpatambag ka? Ipada kang Tito Miguel: 0991-318-9366