Naghandom sa tanang panahon

Gibati og tumang kaluoy si Laida nga nagtan-aw sa iyang silingan nga si Imong nga naglingkod sa usa ka silyang tuwangtuwang kinsa wala nay kahayag ang mga mata. Usa siya ka buta. Dili
gyod siya usa ka buta nang daan sa iyang pagka tawo. Nabuta siya tungod sa pagkahulog niini gikan sa taas sa edipisyo diin kini magtrabaho isip usa ka kantiro o mason.

Nag-una ang iyang ulo ug matod pa sa doktor may ugat nga naapektohan sa iyang mga mata gumikan sa kakusog sa pagkahagsa niya gikan sa ikatulo nga andana sa balay. Ug tungod niini, agakon na lang siya sa iyang anak nga si Pitoy kun asa siya gustong mopaingon.

Luoy kaayo siya karon, kay ang iyang asawa nga si Virginia wala na mouli sa ilang balay. Tungod tingali wala nay silbi ang iyang bana nga usa na ka patay’ng buhi kay dili na makakita ni makapangitag trabaho nga ilang kabuhian. Dunay nag-ingon nga si Virginia mikuyog og laing lalaki. Ug duna say nag-ingon nga miadto kini didto sa Olongapo ug misulod pagka GRO sa usa ka night club o bar didto.

Unya duna say miingon nga si Virginia maayo ang kahimtang karon kay gipuyopuyo og usa ka tiguwang biyudo nga dato ug dunay mga negosyo sa siyudad ug dihay nakakita kuno nga nanaog kini gikan sa sakyanan sa usa ka polis. Unsa man gyod? Hain may tinuod ning mitumaw nga mga tabitabi? Bunga lang kaha kini sa paggilok sa mga balhibo sa dila sa mga tabian o mga tsismosa sa ilang dapit? Ning maong tabitabi, igo lang intawon molugmaw ang  mga luha ni Imong nga manaligdig gikan sa iyang mga mata nga wala nay panan-aw, mga mata nga binilanggo sa kangitngit.

“Ayaw lang og kaguol, Imong, total, nia na man kining imong anak nga si Pitoy. Siya maoy katapusan mong paglaum, kay kun mudako na kini siya ug maswertehan, mao ni makaughat sa inyong kalisud ron, bright ra ba ning bataa,” dihay ganay sa pagdasig ang mga pulong ni Laida. Kuwartahan kini si Laida ug usa ka dalagang guwang nga dunay negosyo sa mga alahas ug mga pagkaon.Ug kay way gibuhi maong daghan na kaayo kini siya’g kuwarta nga tinigom sa bangko.

“Unta, Laida, kun maluoy nako ang Ginoo,” hinay ang tingog sa buta. “Ang Ginoo ra gyoy mahibawo ning akong sitwasyon, nganong naingon ko ini. Ug si Virginia, mibiya dinhi namo, kun hain siya karon, ambot, wa ko kahibawo ... tingali, wala na siya mahigugma nako, kay buta naman ko...”

“Mosugot ka, Imong, nga ipahiling ko ikaw sa doktor, ug kun moingon ang espesyalista nga operahan ka, ako’y bahala sa galastohan,” hinay apan matinud-anon ang tingog ni Laida.

“Di ba makauuwaw kaayo, Laida. Ikaw nga dili nako bahog paryente maoy naningkamot nga makakita ko’g balik?” morag puno sa  pagmahal ang tingog ni Imong. Tuod, gioperahan si Imong. Ug kaluoy sa Ginoo nahibalik ang iyang panan-aw. Nagpasalamat si Imong kang Laida.

“Unsaon ko pagbayad nimo, Laida, sa akong utang, nga wala pa man koy trabaho. Sige lang, kay kun makabalik ko sa akong trabaho hinayhinayan tika’g bayad, ha...” pasabot-hangyo ni Imong.

“Okey ra, uy, Imong. Wala man ko maningil. Ang importante nga makakita ka, di ba?” ni Laida pa nga ingon sa dunay buot ipasabot ug kini dali rang nasabtan ni Imong.

Talilarga na si Laida paingon sa Los Angeles, California, kay tua man didto manimuyo ang iyang papa ug mama ug siya rang usa dinhi ug nakahukom siyang molarga didto sa Amerika.

“Laida, magpaabot ako sa imong pagbalik,” yano apan tugob sa kahulogan ang gipamulong ni Imong.

“I-imo akong paaboton, Imong? Ngano man?” mitutok si Laida sa lalaki nga hilom usab niyang gihigugma.

“Tungod kay ... tungod kay mahal ko ikaw, ikaw ang mipabalik sa akong panan-aw ... ug kun dili ka man mobalik dinhi, maghandom ako kanimo sa tanang  panahon...” milugmaw ang mga luha ni Imong.

“Mobalik ko dinhi, uy, Imong. Tungod sa usa ka tawo nga akong gimahal,” ug tugob sa gugma nga migakos si Laida kang Imong kinsa mihalok sa mga ngabil ni Laida. (Kataposan)