Nag-abot ang duha ka Sugboanon sa birthday party ni Aileen Bacus sa Sarasota, Florida. Si Luis taga-dakbayan sa Sugbo samtang si Boy Allan taga-Talisay. Kadto pang higayona nga nagkita sila ug nagkaila. Si Luis bag-o lang miabut sa Florida ug si Boy Allan taudtaod na sa America nga nagpuyo sa Miami, Florida. Bakasyon lang si Boy Allan sa Sarasota atol sa birthday ni Aileen. Pulos sila way trabaho ug nagpabuhi lang sa ginikanan ug sa asawa. Sila mga way papel nga makatrabaho sa America gawas sa ilang visa.
“Sa didto pa ako sa Pinas, hayahay ang akong kinabuhi...!” Pasiuna ni Luis samtang nagpaabot sa agda ni Aileen.
“Unsa ma’y imong trabaho sa ato...?” Sakgaw pangutana ni Boy Allan.
“Tigpatuktok sa manok hiniktan ni papa...!” Dali nga tubag ni Luis.
Sugal ang pangita sa amahan ni Luis samtang ang iyang inahan usa ka nars sa tambalanan. Aron mouswag ang ilang kahimtang, nanimpalad sa Florida ang ginikanan ni Luis ug kay ulitawong gulang nadala si Luis sa ilang panimpalad sa America. Bugtong sab siyang anak.
“Unsay trabaho mo dinhi sa America?” Sukna ni Boy Allan.
“Drayber nila ni papa ug mama. Sa ospital si mama ug si papa sa mall. Hatud-kuha nilang duha...!” Matud pa ni Luis.
Sa ilang pagpangaon sa lamisa, si Boy Allan miingon usab ngadto kang Luis.
“Parihas ta nga way trabaho. Pabuhi lang ko sa asawa kay siya ang may trabaho!” Mipatin-aw si Boy Allan. Usa sab ka nars ang iyang asawa nga nag-alagad sa tambalan sa Miami.
“Abogado ako sa ato. Kuwarta ang matag bista. Dinhi sa Florida, wa ako’y nahut kay di ko kapanlaban. Lahi ang balaod dinhi sa Florida ug lisensiya ang kinahanglan.” Migiswid ang simod ni Boy Allan nga nag-ingkib sa paa sa piniritong manok.
“Unsa man diay ang trabaho mo karon?” dason ni Luis.
“Ako ang tig sa balay: Tigbantay sa duha ko ka anak..” Ukon-okon nga tubag ni Boy Allan.
“Kalami ‘anang kinabuhia, ahh.!” Ingon sa nakalitan si Luis.
“Lami na’ng ikaw ang inahan ug ikaw sab ang ilang tatay. Pagka-inatay...!” Sa isug nga pangatarungan ni Boy Allan, mibadlong ang inahan ni Luis.
“Pag-istorya lang mo’g lain, ayaw kanang butanga. Pakaulaw lang mo dahhh!” Nagtinan-away si Luis ug Boy Allan ug nangahilum sila. (Katapusan)