Nahilom si Albert. Nagpanglingo siya. Ingon sa dili niya madawat ang gisulti sa hinigugma. Ug mitungab na usab siya sa beer nga sulod sa iyang baso. Nasabtan niya nga ingon sa dili gayod magpapugong si Josheba kaniya. Gusto gayod kining moadto sa Canada.
“Nurse ka, Josheba,” ni Albert pa nga misulay pagtandog sa garbo sa iyang hinigugma, ug lain kaayong hunahunaon nga ang usa ka propesyonal nga sama kanimo mosugal na lang sa walay klarong trabaho. Tingali unya’g Domestic helper ang imong makuhang trabaho.
Wala nay laing katarongan nga nasikop si Albert aron pagbugnaw sa laraw sa dalaga sa pagbiya sa Pilipinas.
Apan wala mosalir ang iyang nahunahunaan nga paagi.
“Dili domestic helper, Albert,” patin-aw ni Josheba nga ingon sa nakakita’g gamay’ng gawang sa sidsid sa hunahuna ni Albert nga sarang niyang kalutsan. “Hospital na gyud ang akong alagaran didto. Trabaho gihapon sa usa ka nurse ang akong sudlan.
Nahilom na usab si Albert. Naabisan siya’g dila sa gipanulti ni Josheba. Miduko na lang siya ug nanaguto nga gisundan sa halawom nga panghupaw. Naghunahuna siya. Sa iyang natugkad karon iyang nasuta nga maliso pay buko sa kawayan ang hukom sa dalaga. Desidido gayod kining moadto sa Canada.-- Sumpayan pa