Planted evidence

Bugnaw ang aircon sulod sa husgado ni Judge Fernando Lapaz karong buntaga. Apan may mga lusok sa singot nibutho sa agtang ni Father Wilben Duhig. Basahan na siya sa hokum sa huwes mahitungod sa iyang kaso nga qualified theft. Wa siya mahimutang sa iyang gilingkuran sulod sa husgado. Gihasol sa kakulba iyang galamhan. Ang iyang abogado nga si Atty. Noel Penaflor mapahiyumon nga naglingkod sa may taas nga lamesa sentro sa husgado. Tupad niya ang ubang mga abogado ug fiscal o prosecutor.

"Criminal Case No. R-162. People of the Philippines, plaintiff, versus Wilben Duhig, accused. For Qualified Theft. For Promulgation of Judgment!" nilanog ang kusog nga tingog sa Court Interpreter nga si Michael Damayo nga nibasa sa kalendaryo sa mga kaso. "Appearances," matud sa huwes nga daw nagsotana’g itom nga naglingkod sa malatrono nga lingkuranan. "Appearing for the prosecution, Your Honor. Ready," ni Prosecutor Teddylyn Reyes dungan sa pagtindog. Tupad niya sa wala si Marivel Bullulan ang private complainant kon kihante. "Respectfully appearing for the accused, Your Honor. Likewise, ready for the promulgation of judgment ni Atty. Penaflor dungan sa pagtindog. Nisenyas siya ni Fr. Wilben nga patindugon. Ug pabarugon atubangan sa huwes ug court interpreter. Tungod sa tumang kanerbiyos, daw naglutaw sa hangin si Fr. Wilben nga nilakang padulong sa sentro sa husgado.

Kahigayonan gyud ang nagsugo nga mapugos si Fr. Wilben sa pagpasaka sa kalubihan luyo sa simbahan diin siya ang kuraparuko. Pwerteng pobreha parukyaha. Parukya sa San Damian nga nahimutang sa baryo Herbarium, lungsod sa Sibundoy amihanang Sugbo. Minus kaayo’g koleksiyon simbahana. Kay mas daghan ang manimba sa simbahan sa laing tinuhuan.

Naglisod si Fr. Wilben og bayad sa konsumo sa kuryente, tubig, ug telepono sa maong simbahan. Napugos siya’g sugo ni Rel Becalas iyang sacristan ug houseboy nga si Jover Campus (round ang trabaho, dala diyanitor, kusinero, labandero, hardinero ug mensahero) sa pagpasaka sa mga lubi luyo sa simbahan. May sobra 40 ka punoang lubi ang tunga sa hektaryang luna.

Ang pagpangawat og lubi, qualified theft ang kaso, sumala sa Revised Penal Code. Nagdahom ang pari nga simbahan ang tag-iya sa kalubihan sa luyo sa simbahan. Gidepensahan niya iyang mga sinugo nga inosente sila. Kay siya'y nagsugo, siya lay ikiha.

"Sayon ra na imong kaso," ni Atty. Penaflor nga mapasegarbuhon nga nisulti ngadtong Fr. Wilben pagpangunsulta sa pari sa bupete sa abogado. "Palubngi la’g napulo ka sakong kalabera ang kalubihan. Sugoa imong mga tawo. Unya dangtag pila ka buwan, igong mabuhi sa uwan ang mga kinawutan, akong ipa-ocular inspection sa husgado ang kalubihan" sa abogado samtang naglingkod sa iyang lingkuranan nga motuyoktuyok. "Nganong palubngan man nimog kalabera?" sa pari. May gihikaphikap sa walang bulsa sa iyang puti nga polo. "Akong probahon nga ang maong luna menteryo kaniadto nga gipanag-iya sa simbahan. Busa, ikaw nga alagad sa simbahan, may katungod sa pag-ani sa abot sa yuta sa simbahan" ni Atty. Penaflor. Naglisuliso sa gilingkuran. "Salig lang ko nimo, attorney" ni Fr. Wilben. Nagsige’g kuot sa iyang rosaryohan.

Hilom ug sekreto niyang gituman ang sugyot sa abogado. Nagpatabang siya’s iyang sakop.

"THE ACCUSED, being a priest, had no intent to gain in gathering the coconuts because it was his honest belief that the land where the coconuts grew was owned by the Church. It was proven that the land was a cemetery owned by the Church through the presence of human skeletons scattered in various spots in the area. The elements of the crime of qualified theft were not proven beyond reasonable doubt. Thus, the accused is hereby ordered acquitted of the crime charge..." nagkanayon ang Court Interpreter sa iyang pagbasa sa hokum.

Daw naibtan og tunok si Fr. Wilben. Hilom siyang nangaleya ug nangayo’g pasaylo sa Diyos. Lahi man ang balaod sa langit. Ang balaod sa yuta nga balaod sa tawo, di man kapasaylo. Busa pangitaan gyud og lutsanan. Kasagarang planted evidence maka-konbikto. Ang iya nakaabswelto. (Alang sa libre nga konsulta, guntinga ning sugilanon ug dad-a sa opisina sa tagsulat. Iatol og Sabado)