Pagdeklarar og state of imminent disaster gitun-an
CEBU, Philippines — Wala pa magdeklarar ang kagamhanan sa Dakbayan sa Sugbo og State of Imminent Disaster bisan pa man og nagkagrabe ang epekto sa El Niño phenomenon.
Gikumpirma kini sa Cebu City Public Information Office (PIO) nga wala pa makahimo og hukom si Mayor Nestor Archival kabahin sa maong deklarasyon gumikan kay nagpadayon pa ang pagtimbang-timbang sa mga posibleng pagpangandam ug interbensiyon sa siyudad.
Tungod niini, wala pa usab makapagawas og executive order ang City Legal Office (CLO).
Sa press conference niadtong Lunes, Nobyembre 16, 2026, gipadayag ni Kenneth Siasar kinsa chief of staff ni Mayor Archival nga padayon pang gisusi sa disaster management team kun igo na ba ang kasamtangang mga lakang sa pagpangandam aron maatubang ang hulga sa El Niño o gikinahanglan na ba ang pormal nga deklarasyon.
Gikonsulta usab sa Executive Department ang CLO aron masuta kun gikinahanglan ba ang State of Imminent Disaster declaration aron mapadali ug mapundohan ang mga pagpangandam batok sa posibleng grabeng epekto sa grabeng huwaw.
Una nang niduso og resolusyon si Konsehal David “Dave” Tumulak nga nag-awhag kang Archival sa pagmando sa nagkalainlaing opisina sa siyudad nga magpatuman og preventive measures batok sa posibleng epekto sa El Niño.
Ang resolusyon ni Tumulak giaprobahan na sa konseho niadtong Nobyembre 17, apan ang pagdeklarar gihapon sa State of Imminent Disaster mag-agad sa desisyon sa mayor.
Ubos sa Republic Act No. 12287, o ang Declaration of State of Imminent Disaster Act, gitugotan ang mayor nga magdeklarar og State of Imminent Disaster base sa rekomendasyon sa Regional Disaster Risk Reduction and Management Council (RDRRMC) nga mag-agad sa resulta sa pre-disaster risk assessment.
Sa pagkakaron, nagpadayon pa ang pagtuon sa administrasyon ni Archival kun unsang mga lakang ang angay ipatuman aron maandam ang syudad sa posibleng epekto sa nagkagrabeng El Niño. (BANAT NEWS)
- Latest















