992 nadakpan sa Safer Cities Initiative
CEBU, Philippines — Mokabat sa 992 ka apprehensions ang natala sa Cebu Police Provincial Office (CPPO) atol sa duha ka adlaw nga operasyon ubos sa Safer Cities Initiative sa tibuok lalawigan sa Sugbo niadtong Oktubre 21 ug 22, diin mikabat sa P365,200 ang mga multa ug penalidad nga nahimo.
Sa report sa CPPO, 649 ka paglapas sa lokal nga mga ordinansa ang natala niadtong Oktubre 21, samtang 343 ang natala pagkasunod adlaw, Oktubre 22.
Abot 587 ka tawo ang gipamulta samtang 405 ang gipasidan-an ug gibuhian ug nakakolekta og P258,250 nga multa.
Sa Oktubre 22, 170 ka tawo ang gisitar ug nakamulta tanan og P106,950.
Sa mga paglapas nga natala niadtong Oktubre 21, labing daghan ang nakalapas sa mga ordinansa sa trapiko sa siyudad ug munisipyo, pag-inom og makahubog nga ilimnon sa publikong lugar, paglapas sa curfew, pagpanigarilyo sa publikong lugar ug paghukas-hukas.
Sa report sa Oktubre 22, gilakip usab ang mga paglapas sa ordinansa sa trapiko, pag-inom ug pagpanigarilyo sa publikong lugar, paglapas sa curfew sa mga menor de edad, paglatagaw nga walay pang-ibabaw nga sinina ug paggamit og karaoke lapas sa gitugot nga oras.
Matud pa ni CPPO Director Police Colonel Abubakar Udang Mangelen Jr.
gikinahanglan ang kooperasyon sa publiko ug ang pagpaningkamot sa matag residente sa pagsunod sa balaod aron mahimong epektibo ang mga operasyon.— IBM BANAT NEWS
- Latest
