CEBU, Philippines — Nasikop ang us aka 39-anyos nga lalaki kinsa giingong nanigbas gamit ang sundang ngadto sa iyang 60-anyos nga silingan kinsa nakabangi kaniadto sa suspetsado diha sa Sitio Camintong, Barangay Malones, Lungsod sa Dalaguete, ang ulahing insidente nahitabo niadtong Martes sa gabii.
Giila sa kapolisan ang suspetsado nga si alyas “Greg” samtang ang biktima mao si alyas “Jose”, minyo, parehong residente sa Barangay Malones.
Matud sa Dalaguete Municipal Police Station nga nakadawat sila og taho gikan sa usa ka concerned citizen kabahin sa pagpangatake ug dali sila’ng nitubag sa maong alarma.
Base sa imbestigasyon sa kapolisan nga nagkabangi kaniadto ang suspetsado ug biktima ug nagkasinukmagay kini.
Giingong naghulat si Greg sa paglabay ni Jose ug dihang nakita niini ang biktima kalit kining gitigbas sa suspetsado gamit ang sundang.
Si Jose nakaangkong og samad tinigbasan sa iyang tuong bukton ug dali kini gidala ngadto sa Isidro Kintanar Memorial Hospital.
Human sa insidente nasikop sa kapolisan ang suspetsado ug natingkagol sa detention cell sa Dalaguete Police Station.
Ang suspetsado gikatakdang mag-atubang og tukmang kaso sa nahimo niining kalapasan. (BANAT NEWS)