CEBU, Philippines — Gibana-bana ni Cebu City Mayor Nestor Archival nga mokabat sa P400 milyon hangtod P500 milyon ang kinahanglanon alang sa hingpit nga rehabilitasyon sa Boy Scouts of the Philippines (BSP) campsite sa Capitol Hills, aron mahimo na sab kini nga sentro sa scouting activities. Si Archival nagsilbi nga Regular Board Member sa Boy Scouts of the Philippines – Cebu Council ug miingon nga plano niya nga ipaubos og rehabilitasyon ang mga pasilidad sa 20-ektaryang campsite nga legal nga gipanag-iya sa BSP nga gihatag sa Kapitolyo.
Sa ulahing pagbisita sa mayor, nakita gyud niya nga luoy na ang maong lugar ug daghan nang guba nga kinahanglang ayuhon.
Mao nga atol sa iyang paglarga sa kauluhan niadtong Lunes, Hulyo 13, 2026, iyang gihisgutan ang plano sa BSP Cebu ngadto kang Department of Budget and Management Secretary Kim Robert Cuevas de Leon kinsa aktibo sab sa Boy Scouts of the Philippines.
Dako ang pasalamat sa mayor tungod kay positibo ang tubag sa iyang plano alang sa malungtaron nga kaayuhan sa mga kabataan sa sIyudad.
Ang unang lakang sa rehabilitasyon mao ang pagbutang og koral sa tibuok kampo aron mapugngan ang pagsulod sa mga informal settlers ug mahunong na ang ilegal nga pagpamutol sa mga kahoy. Lakip usab sa plano ang pagtukod og bag-ong Jamboree Hall, pagpaayo sa ubang pasilidad. Bisan tukuron pag-usab ang mga estruktura, magpabilin gihapon ang nahimutangan sa Jamboree Hall ug sa activity grounds.
Paninduton sab ang swimming pool nga anaa pa sa lugar apan wala na magamit tungod kay wala nay tubig ug dugay nang napasagdan.
Karong adlawa Hulyo 20, magtigom ang mga opisyal sa Boy Scouts uban sa mga engineer ug architect sa Department of Public Works and Highways (DPWH) aron sugdan ang dugang pagplano sa proyekto. — /MEL (BANAT NEWS)