Graphic designer, negosyante nakuhaan og marijuana kush

CEBU, Philippines — Nadakpan sa mga operatiba sa PDEA-7 Regional Special Enforcement Team, PNP Drug Enforcement Group-Special Operations Unit, Cebu City Police Office-City Drug Enforcement Unit ug Cebu City Police Office Station 4 ang duha ka durugista atol sa buy-bust sa Sitio Banilad Proper, Barangay Banilad, Siyudad sa Sugbo niadtong Lunes sa gabii, Marso 17, 2025.

Si PDEA-7 Acting Regional Director II Alex Tablate miila sa mga suspetsado nga sila si alyas Al, 26, taga Barangay Inayawan, Siyudad sa Sugbo ug si alyas Tristan, 37 anyos, graphic designer, nagpuyo sa Barangay Lahug ning siyudad.

Nasakmit sa mga operatiba ang walo ka putos sa marijuana kush nga nitimbang og 165 grams ug nagkantidad og P198,000, usa ka marijuana crusher nga dunay residue, buy-bust money, timbangan, cellular phone,  Yamaha Fazzio motorcycle  ug usa ka Honda Civic.

ug ubang non-drug evidences.

Usa ka buwan na sila nga gipanid-an sa mga otoridad sukad nga dunay nadawat nga impormasyon nga nalambigit sa illegal nga drugas. Matud pa 100 grams ang mabaligya sa duha kada semana.

Sa pikas bahin, duha ka mga durugista ang nadakpan sa managlahing operasyon sa Labangon Police Station 10 ug Waterfront Police Station 3 Cebu City Police Office.

Unang nadakpan sa mga operatiba sa Labangon Police Station 10 ang 41-anyos nga si alyas Pungkol sa ilang buy-bust operation sa Sitio Sta. Ana, Barangay Labangon ning siyudad.

Nasakmit gikan niya ang 55 gramos nga gidudahang shabu nga nagkantidad og P374,000.

Nasikop sab sa kapulisan sa Waterfront Police Station 3 ang 26 anyos nga si Luisito Monreal alyas Louie sa ilang buy-bust Doña Pepang, Barangay Tejero, ning siyudad.

Nakuhaan ang suspetsado og 25.20 grams nga shabu nga nibalor og P171,360.

Ang mga dinakpan pasakaan og kasong kalapasan sa Republic Act 9165.  IBM BANAT NEWS